Afrika ya Leo

Imepakiwa Thursday July 14 2016 | Na Idd Ninga wa Tengeru, Arusha

Kwa Muhtasari:

Siyo, kama ya jana, wakoloni wa mabwana,

Kimya kimya watukana bara halina maana,

Afrika yetu ya kesho, haitokuwa ya leo,

 Afrika yetu ya leo, siyo kama ya jana.

Afrika yetu ya leo, siyo kama ya jana,

Binadamu wanauana, kikatili wachinjana,

Hakuna hurumiana, wote wanalaumiana,

Afrika yetu ya kesho, haitokuwa ya leo.

 

Afrika yetu ya leo, siyo kama ya jana,

Ukatili kila kona, waasi wamejazana,

Magaidi wanatuna, pakujificha hakuna,

Afrika yetu ya kesho, haitokuwa ya leo.

 

Afrika yetu ya leo, siyo kama ya jana,

Demokrasia laana yafanya twaumizana,

Madaraka twapigana, na ngozi tunachunana,

Afrika yetu ya  kesho, haitokuwa ya leo.

 

Siyo, kama ya jana, wakoloni wa mabwana,

Kimya kimya watukana bara halina maana,

Afrika yetu ya kesho, haitokuwa ya leo,

 Afrika yetu ya leo, siyo kama ya jana.

Share Bookmark Print

Rating