HADITHI: JITU ADUI

Na  OMAR ZONGO

Imepakiwa - Thursday, October 20   2016 at  13:52

Kwa Mukhtasari

ZILIKUWA ni shamrashamra za kuiaga karne ya 20.

Huu ulikuwa ni usiku wa kuikaribisha karne ya 21.       

 

Usiku ambao walinzi wa dunia hii walijisahau na kunywa mvinyo kupitiliza hadi kusababisha walewe mno Walisahau kabisa kazi yao ya ulinzi na kufanya Jitu Adui kuingia duniani kirahisi mno.

Jitu Adui ndilo lilikuwa jina lake alilopewa na wazazi wake huko atokako lakini kutokana na utukutu wake na kutokuwa mtiifu alijipa jina la utani ambalo lilijulikana zaidi ADUI WA MAADILI.

Huku walinzi wakiwa na silaha zao wakikoroma na kumwaga ute Jitu Adui aliingia kwa tahadhari huku akiukokota mzigo wake uliojaa Rushwa, Utovu wa nidhamu, Uasherati, Uzinzi na Udanganyifu wa hali ya juu.

Jitu Adui alikuwa makini mno wakati anawapita walinzi wale hakutaka hata kuruhusu unyayo wake utengeneze sauti ndogo ambayo aliamini ingewafanya walinzi wale washtuke na hiyo ingekuwa hasara kubwa sana kwake.

Jitu Adui alitetemeka mno alipokuwa akiona walinzi wale wakijigeuza, walinzi maarufu duniani ambao walipewa jina la Wahenga!

Kutokana na umakini wake Jitu Adui akafanikiwa kuingia ndani ya dunia hii na wakati amefanikiwa kuwapita walinzi wale moyo wake ulilipuka furaha sasa akiamini kuwa azma yake ya kuipotosha jamii itafanikiwa.

"Mimi ndio Jitu Adui a.k.a Adui wa Maadili, nitahakikisha dunia hii inapotoka kimaadili.

Nimenyanyasika sana katika karne zote zilizopita watu walijifanya wapo makini kusimamia utu wao lakini sasa wameniruhusu kuingia kwenye himaya yao, waache tu washerehekee kuipokea karne ya 21 mimi acha kwanza niingie klabu nikawachore kuona udhaifu wao. Mimi ndio Jitu Adui nitahakikisha nawapa majanga hawa watu....shenzi"

Alijiwazia Jitu Adui huku mzigo wake ukionekana kumuelemea, alikuwa na furaha isiyo kifani aliona namna ambavyo ataitumbukiza dunia katika jehanamu la laana na vituko visivyoisha.

Hatua zake za uchovu zilizodhihirisha kuwa atokako ni mbali ziliishia katika ukumbi mmoja wa starehe duniani.

Hakuwa na pesa hata sumni ya kuingilia mule ukumbini lakini kutokana na shamrashamra na furaha za kuikaribisha karne ya 21 binadamu walijisahau na ndipo Jitu  Adui akapenya ukumbini mule na kwenda kukaa nyuma kabisa ya spika zilizokuwa zikisikiliza muziki.

"Wapo wachache sana humu! Halafu mavazi yao bado yana heshima fulani hivi! Nitahakikisha wanajaa klabuni wengi na mavazi yao yanabadilika, nitapigania nguo za nusu uchi..." Alijisemea Jitu Adui, huku akitoa waraka wake aliokuwa ameuhifadhi katika koti lake kubwa alilokuwa amevaa.

Aliufunua waraka huo kisha akaanza kuusoma, Yalikuwa maneno mengi na kila neno liliwekwa kwa namba, neno la kwanza kabisa liliandikwa AKILI ZAO, Jitu Adui alisoma  neno hili tu kisha akatabasamu na kuufunga waraka wake na kuurudisha kwenye koti lake.

Alitaka aanze kucheza na akili za binadamu, Hii ndio mbinu yake ya kwanza kabisa aliyoipa kipaumbele.

"Akili zao zinaimarishwa sana na vitabu, wakisoma hupata uelewa na kujikuta wana ufahamu mkubwa, Nitahakikisha napoteza kabisa mvuto wa vitabu vya nidhamu na maadili, na nina uhakika nitafanikiwa na hili nikicheza na akili za waandishi"

Aliyawaza haya Jitu Kuu ambaye kwa kweli alidhamiria kufanya mapinduzi makubwa ya kimaadili duniani.

* * *

Mishale ya alfajiri ndio walinzi wanashtuka kutoka katika  lope la usingizi. Ni mmoja kati yao ndiye aliyeweza kuona nyayo za mtu.

Alishtuka sana na kuwashtua wenzake, nao walishtuka na wasijue ni nyayo za nani. Hivyo wakaamua kumuita mtaalamu wa kutambua nyayo naye alipozitazama kwa makini akajikuta akisema kwa nguvu "Tumekwisha".

 

SEHEMU YA PILI

Walinzi wote walibaki wakimtumbulia macho mtaalamu wa kutambua nyayo, Alionekana kujutia mno kulewa jana yake bila shaka alielewa madhara ya adui aliyepita kuingia duniani.

"Huyu adui aliyeingia atagharimu maisha ya vizazi vyetu vijavyo. Watakuwa watukutu, wavivu na watahadaika na mabadiliko ya kasi ya teknolojia kwa kujidanganya ni maendeleo makubwa, lakini kama atapatikana mwerevu na kuhesabu faida ya maendeleo hayo na kurudi kwenye hasara bila shaka atagundua faida ndogo sana dhidi ya hasara. Makosa yetu ya kujisahau usiku wa jana yatagharimu dunia hii!"

Alizungumza kwa hisia kali yule mtaalamu wa kutambua nyayo alisema ilikuwa ni habari iliyoibua majuto makuu kwa walinzi wale lakini wangefanyaje sasa na adui keshapenya. Hawakuwa na jinsi tena na ndipo hapo na wao pia walipoanza kupoteza umakini katika kazi yao.

Waliendeleza tabia zao za kunywa mvinyo wakijiongopea kuwa wanapoteza mawazo. Maadili ya kazi yao yalishaporwa usiku ule na Jitu Adui.

 

* * *

Sijui ni utaalamu gani alianza kuutumia Jitu Adui lakini ghafla tu sababu zikaanza kwa wasomaji vitabu, "Kazi nyingi sana sipati hata muda wa kusoma sasa hivi."

Sababu hii ilianza kupenya masikioni mwa Jitu Adui huku ikiibua furaha moyoni mwake kwa kuiona dalili ya ushindi.

Waandishi makini hawakuchoka kuibua dhima zenye tija kwa jamii, na kutoka na upeo waliokuwa nao. Tayari tofauti ya kimaadili wakaiona na kupambana kuiasa jamii katika kusimamia maadili bila kujua kuwa adui wa maadili yupo macho na aliwapinga vikali waandishi.

Jitu Adui akaviona vitabu hivi, alivipenda sana sababu aliziona akili za waandishi na nia zao njema, Alijikuta akitabasamu kwa dharau kabla ya kupuliza sumu ya uvivu wa kutafakari kwa wasomaji vitabu.

Sumu ya uvivu wa kutafakari ilipenya katika mifupa ya binadamu na kuenea miilini mwao, malalamiko ya pili yakapenya masikioni mwa Jitu adui.

"Misamiati migumu na mafumbo, yaani vitabu vinahitaji upate utulivu ndio uvielewe!." Cheko la kejeli na dharau likamtoka Jitu Adui, njia yake  ya kukita mizizi duniani ilikuwa nyeupe sasa.

Bado alikuwa makini na waandishi alitaka sana kusikia wana jipya lipi, Sikio lake likapata kusikia kilio hiki.

" Kazi zetu hazinunuliwi, kipato chetu kinayumba" Furaha ya ajabu ikamfanya ajipige kifua akijinasibu kuwa yeye ndiye JITU ADUI a.k.a ADUI WA MAADILI. Wafanye nini waandishi kama sio kufanya tafiti jamii inavutiwa na nini.

Utafiti ambao haukuchukua muda ulikamilika ukionesha mabadiliko makubwa kwa jamii. Walipenda kusoma vitu vyepesi, na dhima za starehe na mapenzi ndio walihusudu zaidi.

Alijikuta akijisemea Shaaban Robert nguli wa Kiswahili na  mwandishi wa riwaya mashuhuri ukanda wa Afrika Mashariki. "Mwandishi ni mtu wa desturi kama walivyo watu wengine, hawezi kuishi kwa kula ukungu na kunywa hewa"

Ujinga uliwafumba macho binadamu hawakuweza kabisa kufumbua ili wapate nuru ya ufahamu katika vitabu. Kwa pamoja walijikuta wakipiga vita kununua vitabu vya kufundisha na wengi walimiminika dukani kununua machombezo ya mahaba na starehe dhalili ya ngono!

Laiti kama wangelisikia kicheko cha ushindi akicheka Jitu Adui hapana shaka wangemsuta kwa kurejea vitabu vya mafundisho,  mbali na vile vilivyotungwa na watunzi binadamu. Kuna vyingine vilikuja na manabii, navyo vimetelekezwa!

Mbinu yake ya kwanza Jitu Adui imemrahisishia vingi sana, Kwa kutumia mbinu hiyo tu ya kucheza na akili za binaadamu alijikuta akifanikiwa kubadilisha mavazi ya vijana wa kike na kiume.

Tamaduni zao walizihifadhi kwa kiburi kwenye maghala ya kuhifadhia vitu vilivyopitwa na wakati.

Vitabu vyote vilivyoandikwa na waandishi waliotukuka kimaadili havina mahala palipokuwa pakiongelea namna mtu alivyo hodari kitandani wakati akishiriki  mambo ya faragha. Au kuongelea faragha kwa watu wasio na ndoa, hii waliifananisha na laana na adhabu iliyokuwa ikitolewa na waandishi ni mhusika kutengwa na jamii.

Nani leo hii asome dhima hizo zenye mashiko?  Kila mmoja angependa sana kuona kitabu chenye jalada linaloonesha umbo kubwa la mwanamke huku sehemu kubwa ya mwili wake likiwa wazi. Bila kujua ni mafanikio ya Jitu Adui ambaye ameandaliwa karamu kubwa akirejea huko kwao kusipojulikana.

Jamii ya Jitu Adui inajivunia kuwa na kijana aina yake na kwao wanamuita shujaa ambaye amefanya mapinduzi ya kimaadili duniani. Ushindi wake hivi sasa ni pamoja na magonjwa ya zinaa, majanga ya vita, ubaguzi, udini, wivu, uchawi na ukatili wa kila namna.

Waandishi wa kuyanyooshea kidole hayo nao wametekwa na tamaa ya kuuza vitabu vyenye kupotosha maadili, Inashangaza sana dunia hii ni watu wake pekee ndio huwa tayari kukulipa pesa nyingi sana ukiwapotosha.

Jitu Adui lile zigo alilobeba kama zawadi kwa wanadamu amefanikiwa kulipunguza kwa asilmia kubwa amegawa zawadi zake ipasavyo.

Ni nani tena wa kupambana na adui wa maadili, Jitu Adui mwingi wa hila? Swali hili liliponijia ndotoni nilishtuka nikitamka neno "Mimi..."

Ni hakika nilikuwa ndotoni, ndoto ambayo ilinifanya niandike dhima zilizoachwa kuandikwa, na nilipoanza kuandika nilikutana na binadamu walioathiriwa na Jitu Adui wakilalamikia uandishi wangu, eti nina mafumbo na naandika vitu virefu sana wao wanachoka kusoma!

Natikisa kichwa kuwahurumia lakini sikati tamaa sababu bado ningali mapambanoni kummaliza Jitu Adui arudi kwao akiwa dhaifu na ile karamu waliyomwandalia igeuke msiba.

“Sitaacha kuandika ninachoandika sababu nilipenda kusoma aina ya ninachoandika na nilipokikosa ikanibidi kukiandika ili nipate kusoma nilichokikosa

 

MWISHO.