Amlipa kimada laki moja asitoboe siri

Imepakiwa Saturday July 8 2017 | Na DENNIS SINYO

Kwa Muhtasari:

BUTULA, BUSIA

JOMBI wa hapa alilazimika kutoa zaidi ya Sh100,000 kwa mpango wake wa kando kumshawishi asimharibie ndoa yake.

Inasemekana jamaa huyo alikuwa ameweka kimada licha ya kuwa na mke nyumbani na watoto watatu ambao walikuwa wakimtegemea.

Hali hiyo ilimlazimu kumtafutia mwanadada huyo nyumba mbali na kwake ili asikutane na mkewe. Kulingana na mdokezi, kipusa huyo alikuwa akinunuliwa kila kitu na jamaa huku akiahidiwa kujengewa boma.

Penyenye zinadai jamaa alianza kumhepa demu huyo alipogundua kwamba alitaka kuwa mke wake. “Nimechoka kuishi pekee yangu hapa mjini, kama hutaki kunipeleka nyumbani kama mkeo, nitafutie makazi yangu niishi,” kipusa alimwambia jamaa huyo.

Kusikia hivyo, jamaa alilipuka kwa hasira. “Kama hutaki kuishi hapa, shida ni yako. Sina mpango wala pesa za kukunulia shamba popote!’alifoka jamaa.

Kipusa huyo alimuonya jamaa kwamba alikuwa akicheza na moto na angejuta.

“Demu alisema alikuwa tayari kumkabili mke wa jamaa ili ukweli ubainike. Aidha, alidai kwamba iwapo jamaa hakuwa na haja ya kumuoa, alikuwa tayari kumwanika katika vyombo vya habari.

“Ulidhani singejua mkeo, ninamjua na nitahakikisha kwamba amejua kila kitu, hata wanahabari pia watakutafuta na kukuanika wazi,” alisema kipusa huyo.

Inasemekana jamaa alishtuka na kulazimika kumpa mwanadada huyo zaidi ya Sh100,000 ili asidhuhutu kumharibia ndoa yake.

Yasemekana kwamba mwanadada huyo alihama mara tu alipokabidhiwa hela hizo. Jamaa aliyeonekana kuvunjika moyo alidai kwamba alikuwa amepata pigo na funzo la mwaka akiapa kuachana na mipango ya kando.

Share Bookmark Print

Rating