Ukarimu wetu waume umeibua sampuli ya wanawake wasiojua shukrani ni kitu gani

Na CHARLES OBENE

Imepakiwa - Wednesday, November 8  2017 at  11:39

Kwa Muhtasari

DUNIA ya leo imejaa wanaume wasiopenda kufanya la tija. Uzembe huo ndio mwanzo wa maafa kwa vizazi vijavyo! Tuyaweke wazi mambo yalivyo.

 

Mwanamume mwenye pesa ndiye mla raha! Nyie wengine ni kama mende mnaobahatisha maisha kutafuna ukavu wa mwiko!

Kwa mwanamume mwenye pesa huenda heshima na mahaba kochokocho. Nyie walalahoi hamna budi kuvumilia kulambatia vidondokavyo kidevuni.

Zindukeni nyie mnaotarajia wanawake kula na kushiba mate. Mke – hasa mke wa kisasa hana muda kumchumbia mwanamume asiyewajibikia maisha yake binafsi na ya familia yake.

Kwa kuzembea wazazi, vijana wa leo wamelazimika kuvumbua mbinu za kujikimu kimaisha. Huo ndio ukweli! Vijana wa leo wako radhi kunogesha mahaba na chochote si yeyote ilmuradi kibindo kinajazwa masurufu! Hizi tabia za mahambe sijui majahili ndizo kwanza zimechangia kuongezeka mikasa ya watoto kuzaa watoto.

Lawama kwa nani?
Ukosefu wa pesa umechangia pakubwa hali kuzorota ndani ya familia za leo. Badala ya upendo kusheheni, ndoa za leo zinasifika kwa wingi wa lawama na tetesi; vituko na vimbwanga. Kisa na maana? Pesa! Wazazi wamekuwa wakewenza wasiopatana kwa kuzozania pesa!

Nyumba zenu zinakera. Mwanamume haishi kusonya; usoni makunyanzi kama ngozi ya chatu. Mwanamke naye vijembe na ngebe.

Midomo juu kama mkusi wa jogoo. Mwana-mtu hamezi mate sisemi fundo la hewa! Jicho na sikio liko nje kuvizia zinakokwenda pesa za mumewe.

Vipi mtakuza watoto wa hadhi na heshima wanaopenda watu ikiwa nyinyi watu wazima ndio kwanza mnapenda pesa kuliko watu?

Wivu umekuwa jina la pili la mwanamke wa leo! Heri kukubali yaishe! Lakini mbona wasiwe wenye wivu? Wenye navyo wanahofia kupokonywa waume zao! Nao wanaume wa leo ndio nani? Mume wa mtu hadiriki kula vyake. Anataka kupenda na kupendwa na wanawake lukuki.

Kwa nini mkewe asiingiwe na wivu wa kitoto, angalau kutetea maslahi na haki zake? Wenyewe wanasema mume ni mali ya mke eti!

Isitoshe, mke amezoea kupewa na kupewa. Mwenyewe hajui shamba wala soko. Vyote vinampata ameketi kitako! Licha ya biashara kuzagaa wengine wamekuwa viti kushinda sebuleni tu.

Hata biashara ya kijungumeko hawataki kusikia! Wanategemea ujira wa mume angalau kujipa chakula na mavazi. Usitaje mavazi! Wanavaa nguo - sio mavulio - kama wanavyofanya wanaume wa leo.

Sasa vijanajike wameiga hizo tabia. Hawana haja kusoma wala kusomeshwa. Kwa nini mtoto wa mtu ataabike shuleni ilhali anayo macho yanayohitaji wanja sisemi uso unaohitaji poda? Heri urembo kuliko akili! Paja la mwana limezoea kudedea hewani aupate wapi muda wa kuvunja shingo maktabani? Mwana hutazama kisogo cha nina!
Tumekuwa wanaume vichwa pumba, tena mabahili wanaokesha kwenye vilabu vya walevi. Hatuna haya kunywa na kula mshahara ilhali jamaa wanashinda kumeza mate tu. Isitoshe, wanaume wa leo wako mbioni kutafuta na kuwafidia wao hao wanoshinda sebuleni.
Tatizo kubwa ni sisi wanaume tuliopotoka. Tumewazoesha kula vitamu vya tunu tena kwa ukarimu bila kuvitolea jasho. Tunawapa wanawake pesa bila hata kuitishwa. Tunawalipia kodi ya nyumba tena katika mitaa za kifahari ilhali sisi wenyewe tuko mapipani tu.
Tunawazawadia tena vya thamani na kuwafakamia hata kabla kufahamiana. Ukarimu wa mwanamume wa leo umeibua sampuli ya wanawake wasiojua shukrani. Unaweza kujitahidi kumpa kila kitu - roho, nafsi na mwili lakini katu haachi njia dhalala.

Dezo haina ghali. Lawama ni kwa mume wa leo. Tumezoea kuwalipia na kuwafidia kwa kila kitu wala hatuna haja kuwapa elimu angalau wakachuma vyao! Mbona kuwalaumu wanapotetea haki yako!

Dunia hii yetu haina haki. Eti dume la mtu limakinike na ukuli juani. Halafu mwenzake ale ashibe na asiposhiba anaweza kutoa vitisho vya talaka au hata kumpa mumewe kichapo cha ujinga! Ndiyo mapenzi hayo!

Hivyo ndivyo mlivyotaka nyie wanaume mliozoea kuwapa mashangingi pesa kama fidia baada ya kuwafanyia upuzi huo mnaoita mapenzi!

Mwanamume wa leo kukosa mali anaitwa gumegume. Akiwa na mali ndiye mume! Mimi sijamlipa mtu kabla kuona jasho mwilini. Sitaki kujua jasho kutokana na shughuli zipi, lakini nataka kuona jasho! Huo ndio upendo!


obene.amuku@gmail.com

 

 

MWANAMUME KAMILI: Vichuna mlivyojiweka bahari kwa yeyote apigaye mbizi, ndoa sasa zitadumu vipi?

Na DKT CHARLES OBENE

Imepakiwa - Wednesday, November 1  2017 at  06:42

Kwa Muhtasari

JINSI vipigo vya ngoma vinavyobadili mrindimo ndivyo tulivyo sisi majisifu tunaopenda kuponda wenzetu ila hatutaki kubadili ulimbukeni wetu. Hii yetu ni dunia ya kulalama na kulaumiana.

 

Wanawake wa leo wepesi kuwalaani wanaume majahili wanaopenda kula vyao na kutokomea gaizani! Lakini nadra kwao kutathmini kwa kina sababu za kuongezeka hawa walaji wa njiani.

Madume vilevile wepesi kuwalaumu vimwana ambao haja yao ni kujilimbikizia masurufu pasipo haja kujenga kiota. Awe mke ama mume, hakuna aliyeradhi kukubali kosa na kujijenga upya! Sivyo anavyofanya mwanamume kamili.

Tatizo kubwa ni kwamba hizi ndoa za kupanga zimekuwa si tukizi tena. Ndio kwanza hali ya kawaida waja wa leo kukutana vilabuni na kuamka asubuhi wakiwa mke na mume.

Uchumba ni sawia na mtihani-mwigo unaolenga kutathmini uwezo wa mtahiniwa kukabiliana na mtihani halisi.

Wachumbianao wanaweza kujipima kwenye mizani ya ungwana ili kujielewa barabara, kujirudi na kubadili mienendo na tabia ipasavyo kabla kujitoza kilindini kuogelea na nyangumi, papa na mamba wanaojifanya wanadamu katika maisha ya leo.

Kusudi la uchumba ni moja – kumwandaa mke au mumewe na kumfanya binadamu anayeweza kustahimili mapigo na mapapo kwenye ndoa! Ajabu ya leo ni kwamba hata vimwana wenyewe wanaona uchumba kama mtihani mgumu wasiotaka hata kuiga!

Isitoshe, licha ya mishikemishike ya miaka na mikaka wanaume kuvuana na wapenzi wao; watu kuvumiliana; bado hakuna afadhali katika ndoa za leo. Wanaopapurana mahakami ni wengi kuliko wanaobembelezana maabadani. Kulikoni?

Ajabu ya ndoa za leo! Ugomvi unazuka hata kabla kivumbi cha harusi kutulia. Makofi kwa makonde yanaporomoshwa watu wakiwa kwenye pilkapilka za fungate na viungo kukataa kuungama.

Mwishowe waliopendezana wakapendana wanabaki kuwa mahasidi vita kupigana na usaha kutumbuliana! Hicho ndicho kinaya cha ndoa za leo.

Sijui na sina haja kujua nani wa kulaumiwa. Nijuavyo ni kwamba wapo wanaume ambao wenyewe hawajielewi tena hawataki kujua. Wanazo akili ila hawataki kuzitumia.

Wapo vilevile wanawake wasiojali utu – mtoto wa mtu kujitunza na mali yake kutilia poda na nakshi kabla kumkabidhi mume ufunguo wa asali kugema kwa raha yake!

Maisha ya vichuna wa leo yako wazi kama lango kuu na wenyewe wako radhi kudakia uhusiano wowote kama daladala ilmuradi wamekwisha kuzinusa ishara za ukwasi! Mtoto wa mtu hana subira kupima kilindi cha moyo wa mume.

Badala yake anakuwa bahari huru huria – kila mpiga mbizi kuzama na kuibuka apendavyo! Huo ndio ujinga wa nzi kufia kidondani!

Tatizo kubwa zaidi ni kwamba vimwana wa leo ndio kwanza mahambe waliokosa hekima maishani. Mwanamume kamili si kitanda cha sufu au runinga sebuleni! Haistahimiliki kwamba mke wa karne hii anazuzukia televisheni na mazulia kwenye sebule ya mume!

Mwanamume asiyetimiza vigezo alivyoweka mke asione hata shanga kiunoni! Kufanya hivyo ndiko kuelekeza wanaume kujiweka pazuri kimadili.

Ndiko kuandaa mwanamume kamili! Ole nyinyi wenye pupa mnaokimbilia nyumbani kwa mwanamume kutafuta vitanda vya sufu! Mwisho wa siku utalalia na kulilia jamvini! Wapo wanaume wasiojua kumhurumia mke.

Tahadhari mwanamtu usijekuwa funzo kwa wengine!

Laiti wanawake wa leo wangalijua thamani ya mke wasingalichezea shilingi shimoni. Huwezi kunata kama kupe sisemi kujisabilia mikononi mwa janadume ambaye hajaonyesha lengo kukuposa.

Mwanamume hajafika kuwasabahi wazazi wako wala hana lengo kufika kwenu lakini kijanajike na mikoba begani akibandika na kubandua miguu kucha kutwa nyumbani kwa mawanamume. Ujapo temwa si wewe wa kwanza kuwalaani wanaume waovu?

Mwanamtu usijehadaika kwamba mume wa leo anatekwa kwa mapigo ya paja. Nasema hivi kwa sababu wapo vichuna wanaojua mno kuchuna ila hawana akili nyumba kustawisha! Hapo sahau kuolewa! Heri ule ukizihesabu siku! Sina kinyongo watu kula vyao.

Lakini nawaelezeni ukweli bayana!

Mwanamume wa leo nadra kukuposa mwanamtu mzoefu wa vyakula vya mikahawani! Wewe na vibanzi na vijipaja vya kuku. Badala ya mapishi nyumbani eti wewe ndiye mjuvi wa vyakula vya kufunga! Mbona usiachike? Makinika unapokwenda kumtembelea mume angalau ukabebe vitu visivyo vya kawaida mkobani – nyanya, vitunguu na dania!

Si rahisi mwanamume wa leo kumtia kapuni lakini inamjuzu mwanamke kuwa makini na kujiweka thabiti akilini angalau asijeachwa sega kavu lililokwisha tambaliwa na wagemaji! Dunia siyo yenu tena nyie vichuna mnaotafuta vya bure.
Dunia ya leo ipo mikononi mwa wanaume!

Wanaume wa leo wamekwisha kuwa hayawani, mwanamtu huna budi kujiweka thabiti! Enzi za babu kulikuwa na wanaume wangwana.

Akina sisi tusiosalia leo ni miongoni mwa watu wanaotaka vya kunyonga tu. Si wachinjaji hasa! Kila kitu tunakitia kinywani japo hatuna haja kula kushiba.

Hivyo basi ni wajibu wa mwanamke anayetaka kuolewa na kudumu kwenye ndoa kuwa makini kutambua mitihani atakayokumbana nayo katika maisha ya wanaume wa leo. Kutemwa au kuposwa ni mke kependa kupenda!


obene.amuku@gmail.com

 

 

Ikiwa hutaki mke apendeze au apendwe basi ungeoa sokwe

Na CHARLES OBENE

Imepakiwa - Wednesday, April 20  2016 at  15:12

Kwa Muhtasari

Wewe utakuwa gumegume kama tabia yako ni kukereka na kuchukizwa moyo mwenzio akipendeza na kupendwa.

 

EWE mume, kelele za mbu zisikunyime usingizi! Kwa nini wakereka na kuchukizwa moyo mwenzio akipendeza na kupendwa? Kaka zangu, dunia hii yetu ni gala iliyojaa vitu vya kumshikisha mtu homa ya matamanio.

Ni dunia iliyorembwa kwa ustadi wa Rabana na kutonewa vitu vinavyometameta sisemi waja wa hadhi.

Mkeo kupendeza na kuwashikisha watu hamu sio kosa linalostahili kejeli, dhihaka au matusi kila siku nyumbani.

Badala ya cheche za matusi na vita vya paka kupapurana, mke mwenye kupendeza na kupendwa anastahili pongezi na zawadi kwa kuwa mtu wa nidhamu, sifa na siha nzuri na hadhi ya kipekee!

Hizo ni sifa adimu kupatikana kwa mtoto wa kike karne hii!

Wewe hujui wangapi wanaishi na magogo eti wakiwadhania wanawake!

Hatekenyeki hashikiki hata ukimguza wapi! Mlevi chakari! Mwenye shombo utadhani mvuvi! Akizungumza, heri mtoto wa kuboboja! Kwa vyovyote vile, ridhikeni tu.

Ndio maana ya mguu kuteleza na mkono kushika shonde! Paja likinyelewa halikatwi!

Vimwana wa kupendeza na kupagawisha si haba.

Wenye sura za lulu, ngozi ya sufu na upole wa mwanambuzi ni kama nyota za anga. Lakini kumpata mke……mke!

Kwa maana halisi ya mke, ni majaaliwa!

Dunia ya leo ni kama shamba la mawaridi! Acheni kila mwenye macho aridhike na urembo uliozagaa! Kwa hivyo jifunzeni hekima na heshima ya kuishi ya watu.

Nawasihi wanaume wa leo wasitishe chuki na wivu wa kitoto.

Kweli kaka zetu wa leo, wanapenda vita na matusi yasiyofaa. Kupigia watu simu mkijifanya kuwakanya, kuwatahadharisha wasijekuza uhusiano wa karibu na mkeo, ni utoto na mume mwenye tabia hizi hana budi kukomaa kichwa!

Umekwishampata mke, nani wa kukupokonya? Chako ni chako, kamwe hupokonyeki! Akizidisha kero, mpe!

Atachoka na kukubwagia zito lako! Akizaa naye, mpe mtoto! Dawa ya mwenye njaa sio kumhini chakula!

Haileti raha kila siku kero kwa mke, eti anapendeza na anapendwa na watu.

Kila siku kelele za mbu, eti mke anasifiwa mtaani. Vita haviishi nyumbani, eti mke ni mkarimu. Leo vita na huyu, kesho yule.

Jamani, mke hachagui kupendwa bali tabia zake hupendeza na kuwavuta watu karibu naye.

Bora ukaoa sokwe basi

Ikiwa hutaki mkeo kupendeza na kupendwa kwa nini hukumwoa sokwe?

Angalau akionekana mtaani, watu wanakwepa na kujificha! Wivu na utoto usikutie wazimu bure. Mkeo kusalimiwa njiani hakutamchachusha kamwe!

Mja kupendwa ni Mungu kupenda! Hiyo ni haki yake. Dunia hii imejaa wanawake viboko wenye akili za samaki!

Ukipata mmoja anayependeza, acheni dunia iridhike! Msiharibu sura zenu bure bilashi kwa makunyanzi usoni.

Tahadhari msijekufa presha kwa kujifanya kupenda ilhali tabia zenu zachukiza.

Eti siku hizi wanaume hawali wakashiba. Kila mara jekejeke la jasho, roho mkononi akihofia mke kupendwa. Hatulii nyumbani, macho katumbulia kwenye simu ya mke.

Simu inapoita tu, yeye tarishi, “wewe nani?” Upumbavu ulioje! Na wewe ni nani mwenye kufikiri mkeo ni kijitoto cha kuchungwa kama kuku mgeni? Hata ukipata mjinga wa kukuvumilia, iko siku ya siku kero zako zitamfika shingoni!

Wengine wamevuka mipaka! Mume mwenye akili timamu anachukua simu na kutusiana na mwenzake. Mara wanaandikiana arafa za matusi na kutishiana maisha.

Kisa na maana? Anamtetea mkewe! Hataki mkewe kupendwa na kutamaniwa na watu wa nje! Hizo ni akili za mende!

Wewe una mke nyumbani, haja gani kupigana na mbu wasiokukosesha hata lepe la usingizi!

Wacha wenye kutamani waridhishe macho, wewe mpe mwenzako raha! Wakija kugutuka, ua la waridi limenyauka na vikembe sebuleni. Kwa nini kufa presha bure bilashi eti wazozana na watu ilhali kichuna ni wako chumbani; kazi kwako kumchuna utakavyo!

obene.amuku@gmail.com

 

 

Tuwaepushe vijana kuzama katika lindi la ufuska

Na CHARLES OBENE

Imepakiwa - Wednesday, January 6  2016 at  10:31

Kwa Muhtasari

Bila kujali raha leo, karaha kesho, kila kukicha vijana wanazidi kuzama katika kilindi cha ufuska na matumizi ya dawa za kulevya.

 

HERI tuwape vijana elimu badala ya kuwatapeli kwa mahaba yasio kitu.

Vijana wa leo wako hatarini na changamoto zainazowakabili si haba! Pamoja na kutelekezwa, vijana wanayumbishwa na anasa sisemi kughilibiwa na matapeli wanaowahadaa.

Ni wajibu wa mwanamume kamili kumakinika angalau kuwapa vijana elimu badala ya kuwafilisi nafsi bure!

Ukweli ni kwamba ukahaba na ufuska unashirikisha vilevile vijana wa shule na vyuo.

Kila kukicha, vijana wanazidi kuzama katika kilindi cha ufuska na matumizi ya dawa za kulevya.

Raha leo karaha kesho. Wanawake kwa wanaume wakongwe ndio kwanza wanaendesha na kuvuruga maisha ya vijana wadogo bila huruma.

Vijitoto vivulana vidogovidogo vya akili na mili, vinagaragazana kwenye madanguro na madege, mashangingi yaliyokauka mili na mifupa.

Iweje wazee hawa kukiuka desturi, heshima na hadhi ya wazazi na kutokomeza vijitoto hivi visivyojua kitu?

Chambo 

Silaumu vijitoto hivi kwa kutojua tofauti kati ya embe bivu lenye utamu na bichi lililojaa ugwadu!

Hawana kabisa mtu wa kuwaonya na kuwakanya.

Isitoshe, wamelelewa wakiziona na kuzisoma tabia hizi potovu kutoka kwa mama na baba zao, mbona wasiwe gwiji wangali wachanga?

Pesa ndiyo chambo inayotumika hasa kuwavulia vijana na kuwatokomeza katika baharí ya anasa.

Hata samaki wana akili kuliko vijana wa leo.

Angalau samaki anaweza kukwepa mtego wa chambo.

Lakini vijana wa leo hawawezi kukwepa mtego wa shilingi.

Siwalaumu katu kupenda pesa. Ndio elimu tuliowapa.

Vijana wametelekezwa wajilishe, wajivishe na kujikidhia mahitaji wenyewe.

Kazi nazo adimu. Mbona wasizame katika ufuska?  Mtoto wa kike humvishi wala humlishi kitu.

Hawezi kuvalia matambara ilhali jibaba liko radhi kumfadhili. Hata sumu ukiwapa watakula tu!

Wa kuwakanya nani ilhali baba na mama wako mbioni kushindania ufuska pembeni.

Wazazi wamefeli katika majukumu ya kuwakuza na kupigania maslahi ya watoto.

Wasichana wanahimilika wakiavya kivoloya.

Mwana wa kike hajui hata kuhesabu siku za hedhi. Akidhurika ndipo lawama huelekezwa kwa masikini mtoto.

Baba na mamake walikuwa wapi kumpa adabu na adhabu kali kabla hajaingia masihara ya ufuska? 

Kwa kukosa ushauri, tumefanya watoto wetu kuwa vicheche wanaotoswa kulia kushoto kama magunia la viazi.

Wenyewe wanyonge wa kunyongwa na yeyote mwenye mikono.

Tungaliwapa nguvu za masomo na nasaha, nani angewaendesha kama farasi?

Tuwape elimu kabla kuwapa mahaba! Ndio wajibu wa mwanamume kamili.

 

 

Usiamshe majirani, kisa na maana umenyimwa uhondo

Na CHARLES OBEME

Imepakiwa - Wednesday, October 28  2015 at  10:58

Kwa Muhtasari

Badala ya kuzua vioja nyumbani, jamani tuvumiliane! Badala ya makeke na mateke ndani ya ndoa, tuukuzeni unyenyekevu!

 

BADALA ya kuzua vioja nyumbani, jamani tuvumiliane! Badala ya makeke na mateke ndani ya ndoa, tuukuzeni unyenyekevu!

Maisha ya mke na mume ni kama wimbi la bahari.

Yaweza kuwa tulivu na ya kufurahisha au yaweza kugeuka kimbunga chenye dhiki na bughudha.

Yote hutegemea hekima na ukomavu akilini mwa mke na mume ndani ya uhusiano.

Inampasa mwanamume kuelewa kwamba zipo nyakati za hisia kupanda na kushuka. Kuna wakati wa kununa kama kiza la alfajiri au kumwaya furaha kama mwezi mchanga.

Zipo nyakati za kutulia na za kuchacharika kama ndama. Mabadiliko hayo huathiri pakubwa uhusiano na hisia za huba.

Mwanamume kamili hana budi kuelewa na kuvumilia mkewe ili kuepuka mitafaruku na mizozano chumbani kila siku.

Kakangu, unapoamka majogoo kurai haki na mwenzio akakupuuza au akakataa na mali yake, usijenge hoja kubwa wala usiamshe majirani kwa makonde au kusonyasonya.

Hiyo siyo mara ya mwisho nyie kuamkia kitanda kimoja. Vuta kumbukumbu mara ngapi mke amekupa raha kwa ridhaa yake mwenyewe bila vituko vyako? Kwa nini uzue kasheshe kwa jambo ndogo kama hilo?

Kumbuka huba sio hewa inayompa mja uhai wala chakula kirutubishacho mwili. Mwanamume kamili anaweza kuvumilia hadi siku ya ridhaa.

Hiyo ni ishara ya upendo. Kwa nini mume ambake mke na kumkosea heshima?

Wakati mwingine, nishati za mwili hugoma kutoa cheche. Usilazimishe mambo kwa vitisho kama kwamba dunia yaisha.

Wala usimshike mwenzio koo na kumdhulumu! Hizo sio tabia za mwanamume kamili. Kumbuka, maisha ya raha ni kubembelezana.

Zipo siku mume hufika nyumbani jioni na kukumbana na makunyanzi usoni mwa mkewe huku midomo imeganda – hasemi hacheki, hasikii hahisi! Hakuna haja ya bakora, dhihaka na matusi.

Kakangu, usiharibu mambo kwa kuuliza maswali ya balagha au kutamka mambo ya kitoto. Kufanya hivyo ni kumshika bafe mkia! Vumilia na heshimu hisia za mkeo, naye atakuheshimu. Wahaka wake ukiyeyuka, mambo ni mteremko hadi asubuhi!

Kosa kubwa mno la mwanamume wa leo ni kulazimisha mambo. Mara anamshurutisha mkewe kumchangamkia wakati amezongwa na mambo yake.

Nani kasema ni lazima mke akueleze yote yanayomzonga moyoni na kumtatiza akilini? Je, akikueleza anavyojuta kuolewa nawe au anavyokuvumilia- wewe na ujinga wako, utacheka naye tena?

Vichwa vya wanawake vimesheheni makubwa, hivyo usithubutu kulazimisha ulimi wake kukutemea shubiri ya maisha!

Badala ya kuzua vita kwa sababu ya huba, tuvumiliane!

Imekuwa mazoea kwa wanaume wa leo kukasirika na kulalama hasa wanapohisi wamedhulumiwa faraghani.

Labda mke ameshindwa kutekelza wajibu wa chumbani ipasvyo. Iweje wamfanyia mwenzio dhihaka na madharau kana kwamba hujawahi kushindwa jambo maishani?

Ubinafsi na madharu sizo tajriba za mwanamume kamili! Badala ya kuzua vita kwa sababu ya huba, tuvumiliane!

 

wanamume@yahoo.com

 

 

Kama hajatoa mahari hata sidiria asione ng’o!

Na CHARLES OBENE

Imepakiwa - Wednesday, October 7  2015 at  11:11

Kwa Muhtasari

Kama bwege halijakutolea mahari hata kanchiri halistahili kuona!

 

UKITAKA kitu cha mwenzio huna budi kuhakikisha kwamba mwenyewe yu radhi kukupa bila shaka wala shauku! Na hata ukipewa kwa hiari na huna haja nacho mbona usionyeshe uungwana na kukikataa?

Binadamu sio fisi asiyejua kukataa mzoga! Hekima ya mwanamume kamili hudhihirika pale anapokataa shinikizo za tamaa kutaka vitu ambavyo si vyake tena hajavitolea kitu! Lakini kitu gani hasa tunachozungumzia? Werevu nyie mshaanza kupinda midomo na kukonyeza nyusi! Mbona mawazo tayari mmekwisha yaelekeza kuko huko mnakopenda kufikiri hasa tunapotaja neno kitu?

Jamani wenzenu wanaumia moyoni. Kisa na maana? Vyao kuliwa bila yao ridhaa! Wanakeketeka maini kufyonzwa asali na utamu wake - kisha kuachwa masega makavu yasiotamanika wala kupendeka! Wanawake wanadhalilika kwa tabia za wanaume kupenda kuonjaonja na mwishowe kutoweka kama upepo wa kusi. Kulikoni?

 

Subira   

Mwana wa mtu amejizatiti kuhimili ujana angalau kukomaza paja sisemi kututumua bonge la kifua! Mwana mwadilifu tena mrembo wa kutamanika amekwisha kuzingua na kukuteka mawazo. Jamani mwanamume nini kinachoshikisha homa na ashiki kama beberu usije subiri angalau uchumba ukatononoka?

Subira ni tajriba ya mwanamume kamili. Haistahimiliki katu mwanamke kugeuzwa chungu cha mboga kila mpishi kuonja onja kabla hata mchuzi kukolezwa. Hizi tabia za onjaonja mwishowe humpotezea mtoto wa mtu muda sisemi kuachwa mataani akisubiri ndoa ambayo inakuwa hadithi ya paukwa pakawa! Desturi na hekima ni moja: chungu umekwisha tumbukiza ndani mkono huna budi kupakua!

Jamani watoto wa watu haya mambo mtu havutwi kwa kamba! Hata nyie wenyewe hamtaepuka lawama. Iweje mwana na hadhi zako wajisabilia mikononi mwa bwege bila akili na tafakari? Kwa kukosa stara na stahamala wajipeleka kichinjoni na kisu mkononi!

Mwanamume rafiki tu lakini mtoto wa kike hana haya kujipeleka nyumbani kwake usiku; kwapani ametundika mkoba uliosheheni chupi tu. Hajakuchumbia wala kukuposa lakini huna haya kumwachia bwege mwanya kukutambalia na kukuzinga mwili! Mtu ambaye si mumeo atafika vipi kwenye pachipachi zako? Hata woga ni kinga!

Kituo cha mtaani!

Mtoto wa kike, utaonjesha wangapi kabla kuolewa? Mwishowe unabaki kituo cha mtaani, uwanja wa mazoezi hasa! Makinikeni kudumisha hadhi ya mwanamke! Kama bwege halijakutolea mahari hata kanchiri haoni!  Ole nyinyi wepesi kupembejwa! Mtabaki na hadithi midomoni tu!

Msimamo usiodedea ni guzo tena ngao. Asikudanganye mtu kwamba mwanamume kumvulia na kumwonyesha shanga za kiunoni ndiko kuharakisha ndoa! Siku zote mwenye kuonja kutoka chunguni hana hamu kula tena!

kiamua kumpa kabla ya ndoa basi usiwe na shaka kwamba mlaji kala mara ya mwisho!

Mwenye kukupenda hana haja wala tamaa kuonja onja. Jamani wanawake wa karne hii, msikereke mnapopewa nauli kurudi kwenu usiku wa manane.  Huyo ndio mume anayekuthamini na kuheshimu hadhi ya kike! Najua vicheche walivo wepesi kukata kauli!

Mwanamume kamili huwa na kasi kuchumbia mwana wa mtu na kumposa kabla hata fikira na harakati za mwana kutiwa nakshi. Nyie ambao kwanza mnataka kuonjeshwa kabla ya posa mlizaliwa wapi? Kuonja onja kabla ya ndoa ni hatari mno. Mambo yanaweza sadifiana embe dodo likaja kuwa ngoe. Sasa ugwadu wa ngoe utaupeleka wapi?

 

 

Mabusu ya nini vijiani kwa mtu mliyeachana ujanani?

Na CHARLES OBENE

Imepakiwa - Wednesday, September 30  2015 at  20:34

Kwa Muhtasari

Kama sio kufa, wengi wenye tabia za kulamba mate yaliyotemwa wamejikuta taabani wamenaswa wakanata mitegoni.

 

MAISHA ni uamuzi. Ufanisi wa binadamu hutegemea sana maamuzi mema na maafikiano ya hekima baina ya waja. Tatizo linalotusumbua ni kwamba wapo wanaume wenye kero na tamaa; tena wepesi kukurupuka na kuchepuka kutoka kwenye ndoa wakisingizia vijisababu vya kitoto.

Tatizo sio kukurupuka, bali kurudiarudia kinyumenyume na kushiriki huba zenye kumbukizi tu hali mapenzi yalikwisha tamatika. Wenyewe wanasema mwanamume huruma! Huruma ya nini ilhali mate yalikwisha toka kinywani?

 

Ukiyatema, usiyalambe

Kama sio kufa, wengi wenye tabia za kulamba mate yaliyotemwa wamejikuta taabani wamenaswa wakanata mitegoni. Wanaume kwa wanawake wameuana! Wengine wameambukizana magonjwa ya zinaa. Wangapi wamehujumiana kwenye ndoa kwa sababu ya kuamsha hisia zilizokwisha lala? Kama yana ladha, usiyateme! Ukiyatema, katu usiyalambe! 

Mwanamume kamili ni yule mwenye msimamo na anayeweza kusimama kidete bila kudedea au kudondokwa mate. Ije mvua lije jua! Licha ya hekima zote walizojaaliwa, wanaume wa leo zumbukuku kabisa! Hawajui mbinu wala njia za kutamatisha mapenzi yaliyokwisha tamataika! Hawajui vipi kwenda mbele! Mwishowe, wanajikuta kwenye misururu ya donadona na kumbukizi tu wala hakuna chochote zaidi!

Wewe mtu na nyumba yako. Mwenzako mliachana ujanani! Mwakumbatiana nini vijiani? Mabusu ya nini kwa mtu ambaye kweli hamna chochote kilichosalia ila hekaya tu? Eti mwakumbuka mambo ya kale? Huo ni mwanzo mbaya na mwisho wake ni hujuma kwenye ndoa sisemi kufumana mishale. Isitoshe, tabia hizo za kulambalamba mate yaliyokwisha temwa ndizo zinazochochea fujo, vurugu na talaka katika ndoa za leo. Siku zote, mwanamume hawezi kuwa mjanja zaidi ya mwanamke. Mgala mwue haki mpe! Lakini mwanamume kamili anaweza kukataa kutekwa na vishawishi vya kike. Anaweza kukataa kumbukizi za mahaba ya ujanani. Anaweza kusahau kabisa joto la pachipachini enzi za ujanani.

 

Kulenga mbele

Mwanamume kamili anaweza kulenga mbele na kuyaongoza maisha yake bila kurejelea kuonja na kuonjeshwa asali ya ulimbukeni! Hiyo tu ndio ngao ya kujikinga na mishale ya werevu na wajanja wanawake wa leo. Wanawake hawasahau uchungu wa kutemwa kama mate yenye ugwadu! Hata wanapokubali kudonwa, lengo lao sio mwana kutiwa nakshi! Ni njia moja ya kulipiza kisasi. Ole nyinyi wenye tamaa! 

Kaka zangu, hamna budi kuchanuka na kuzinduka kutoka lepe hilo la usingizi. Kuna wendawazimu wengine wanaosafiri masafa ya mbali eti kujuliana hali tu na aliyekuwa mpenzi wa awali. Hata ng’ombe hajipeleki kichinjoni, seuze binadamu mwenye akili? Kama yana ladha, usiyateme! Ukiyatema, katu usiyalambe!

 

 

 

Upendo ni kudumisha heshima kabla jazba

Na CHARLES OBENE

Imepakiwa - Wednesday, September 23  2015 at  16:02

Kwa Muhtasari

Lau wanaume wa leo wangaliwajibikia kukuza maadili, nani asingalikuwa na mke mwema?

 

SINA haki kuwahukumu wala sababu kuwatetea wanawake wa leo. Lakini wakati mwingine tunawalaumu na kuwasingizia makosa bila sababu wala tathmni. Lau wanaume wa leo wangaliwajibikia kukuza maadili, nani asingalikuwa na mke mwema?

Lawama na laana si dawa ya ulimbukeni! Uerevu hukita akilini sio kwa uchungu wa bakora bali kwa upendo usiopinda shingo. Mke mwema hujifunza wema kutoka kwa mumewe. Kama mwana anavyotazama kisogo cha nina ndivyo mke huerevukia vitendo vya mumewe. Sasa ni wazi kwamba wanaume wanavuna anachopanda!

Kwa vitendo vya ajabu sisemi tamaa ya kustaajabisha, wanaume wa leo ndio huchochea maovu na kuwapotosha wanawake kufanya mambo ya aibu. Tunashawishika na kujazibika kama wehu hasa tunapomwona mwanamke kaacha maungo wazi kama mende.

 

Ugumeugume

Sasa wenzenu washatambua jinsi ya kuwapagaza wazimu. Wameamua kuvua nguo za hadhi na kuvivalia hivyo vitambaa kwa raha zenu! Ole nyinyi mliodhani mwapanda mbegu za chenza; sasa mwavuma ndimu!

Mwanamume kamili hana budi kumpa mke mfano mwema! Mawaidha na nasaha zitakazomfanya mtu wa hadhi mbele ya watu, tena mke wa thamani! Ithibati ya upendo ni kudumisha nidhamu na heshima kwanza kabla kutanguliza mbele jazba.

Mume mwenye kumridhia mkewe kuvalia kama hawara bila shaka ni gumegume! Jamani, aibu kwa mtoto wa kike ni ngao! Angalau ajue nini ya kuficha na wapi pa kufichua! Lakini leo mambo mzongo! Mtoto wa mtu hana aibu kuzianika dodoki zake kwa ridhaa za mume.

Kwa nini mwanamume kumridhia mke kuvalia kijiguo kama kwamba hajui sehemu nyeti za kike zi wapi? Isitoshe, mume huna haya kumtembeza barabarani na kijiguo kilichokaa juu ya makalio mfano wa mkia wa mbuzi! Heshima hiyo kweli?

 

Kipochi pajani

Watoka nyumbani na mke kwenda kupanda gari la umma, lakini mke hawezi kuketi bila kipochi pajani! Kwa nini kuona haya ilhali ulijua wazi athari ya mavazi duni uliyovalia?

Sauti ya mwanamume kamili ni kama sheria! Analosema mume linatekelezwa kwa heshima na staha! Kama mke hajavaa nguo ya heshima na stara, hatoki nyumbani! Ndiyo hadhi ya mwanamume!

Mke mwenye kupenda kujidunisha dawa yake uwazi. Akivalia vibaya, mwambie ukweli kuliko kumficha! Lakini sivyo wanavyofanya wanaume wa leo. Kila mke anavalia anachopenda na kwenda anakotaka. Mume hasemi kitu. Isitoshe, wanashabikia kinyaa na uchi

Maumbile ya kumfaidi mumeo ndiyo sasa raha ya wapita njia! Hadhi na thamani ya mke ipi? Ndiyo sababu kuu uchumba wa siku hizi umekosa neema. Mume hajakuoa na tayari hakuna siri asojua mwilini mwa mke! Mkiachwa mataani mwasema mwaonewa!

Sifa za mnyama ni kufanya mambo bila tafakari. Sisi binadamu, mbona tabia za kinyama? Sasa hivi mijini hajulikani nani mke wa mtu wala nani mwana wa kulishwa chambo. Mavazi wanayovalia changudoa kwenye vijia vya usiku angalau kuvutia wateja ndiyo mavazi tunayoridhia mchana wa jua! Jamani tatizo nini kufikia hatua ya kugeuka hayawani na akili tunazo?

Kwa mtindo huu wa kutembea uchi mkidhani ndiyo njia za kuwafurahisha wanaume, poleni sana!

 

 

 

Uungwana wa mume halisi ni unyamavu na usikivu

Na CHARLES OBENE

Imepakiwa - Wednesday, September 16  2015 at  13:48

Kwa Muhtasari

Inakera mno hasa kumwona mwanamume mpayukaji mwepesi kupaza sauti na kugombana kwa vijimambo vinavyoweza kutatuliwa taratibu tena chumbani.

 

UNYAMAVU ni hekima, tena ngao kwa mwanamume kamili! Nyie mnaodhani mwanamume ni ndevu kwani hamjaziona za beberu? Nani alisema kwamba kila jambo au tofauti nyumbani lizue ubishani na vurugu?

Eti mwanamume mmoja alishikwa na kichaa na kuteketeza nyumba na mali kwa sababu mke wa kugombana naye alifunganya virago na kumwachia nyumba! Jamani tangu lini ugomvi ukawa chakula cha mja? Hizo ndizo akili za baadhi ya ndugu zetu!

Inakera mno hasa kumwona mwanamume mpayukaji mwepesi kupaza sauti na kugombana kwa vijimambo vinavyoweza kutatuliwa taratibu tena chumbani. Na sio kupaza sauti tu inayochukiza na kukera, hata vita mbele ya watoto hudunisha hadhi ya wanandoa sisemi kukoleza chuki ndani ya nyumba. Hamna budi kufikiria tena hasa nyie kina yakhe walevi wenye mazoea kugeuza nyumba ukumbi wa masumbwi!

Utamtambua mwanamume kamili kutokana na jinsi anavyojizatiti kudhibiti sio tu kinywa na ulimi bali pia hisia na fikira potovu. Heri kukejeliwa na watu lakini wasijue yaliyokuziba kinywa. Kidomodomo sio tajriba ya mwanamume kamili! Ndio maana kasuku hana uwezo wa kuoa licha ya kuwa mwingi wa maneno!

Tunasikitishwa vilevile na wanaume majisifu. Yaani kina yakhe wasiojua kufyata vinywa na kudhibiti ndimi zao. Neema ya ulimi kuzungumza lakini katika njia inayokuza heshima.

Kila kitu ndani ya nyumba lazima mwanzo ni yeye na mwisho vilevile. Wajisifu ungali mtu wa pumzi, jamani ukifa watafanya nini walio hai? Tenda mema wachia watu mwanya kuona wema na kutononoka. Sifa nzuri lakini sio sifa za kujitakia.

Mbele ya watu, ungwana wa mwanamue kamili ni unyamavu, usikivu na utulivu. Wanapozungumza wadogo kwa wakubwa, mwanamume kamili hana budi kutumia muda wake kushika mawili-matatu kati ya mengi yanayosemwa. Lakini sivyo tabia za ndugu zetu wa leo.

Kuzua kero raha yao

Kasuku hana ushindani! Wanajifanya kujua kila kitu na kila neno. Hawaambiliki hawasemezeki. La ajabu ni kwamba, ndivyo walivyo hata ndani ya nyumba. Raha yao kuzua kero na ubishani tu wala hakuna la maana linalosemwa!

Na sio mazungumzo tu yanayoudhi. Ndimi za wanaume wa leo hazijui kubaini na kubana matusi. Wanazungumza kinyaa hata mbele ya watoto. Isitoshe, wako ange kutetea hoja zao kwa ncha ya upanga.

Jamani nani anataka kuwa mke wa mwanamume asiyesikia wosia wala nasaha? Mke yupi yuko radhi kukonda mwili kwa kuzomewa na kubezwa siku zote na mwehu asiyejuakunyamaza?

Kosa kubwa analofanya mwanamume wa leo ni kujifanya kujua! Siku zote kujishaua. Kitu kidogo cha mume kumezea moyoni, dunia nzima itasikia. Akipandishwa cheo, mtu hamezi mate. Akinunua gari wapita njia walaani kwa tifuo la vumbi. Hata kutunga mimba wakunga hawali wakalala kwa vijembe na ngebe. Jamani si debe tupu ndilo litikalo?

Kuna hatari kubwa kuishi na mwanamume king’anganizi. Rahisi sana kutibua amani kwa ugomvi. Maafikiano nyumbani nadra kupatikana. Hizi ndizo sababu za wengi kuchepuka na kutafuta hifadhi na liwazo kutoka nje ya ndoa! Ikiwa mume mbishani kwa nini mwanamtu asitafute sikio la kunenea?

Hawa watu wajuvi balaa! Mwanamume mjuvi haishi shaka. Mwepesi kutunga hadithi na kubuni fikira za kitoto hasa kumsingizia mwenzake. Kila jambo analodhani kwake ndilo! Shaka za nini ndani ya ndoa ilhali mtoto wa mtu hukumwokota chakani! Isitoshe, shingo ya kuku wewe mlaji hukuipata wajua wangapi wachinjaji?

 

 

 

Wanaume ndio wanachochea mavazi duni ya kina dada

Na CHARLES OBENE

Imepakiwa - Wednesday, September 2  2015 at  19:10

Kwa Muhtasari

Wanaume hushawishika na kujazibika kama wehu hasa wanapowaona wanawake wameacha maungo wazi kama mende.

 

AKIPENDA mume mke hana pingamizi! Wanaume ndio chanzo cha vituko na mavazi duni tunayoyaona mitaani hasa kwa kina mama na binti zetu.

Sina haki kuwahukumu wala sababu kuwatetea lakini wakati mwingine tunawalaumu wanawake bure bilashi. Lau wamaume wangaliwajibika kukuza maadili, yote yangeepukika!

Wanaume wa leo ndio wanaopotosha na kuwasukuma wanawake kufanya mambo ya aibu, na kuvaa vijiguo vya fedheha visivyomsitiri mke! Vipi? Tunashawishika na kujazibika kama wehu hasa tunapomwona mwanamke kaacha maungo wazi kama mende. Washajua jinsi ya kuwatia wazimu. Sasa wameamua kuvua nguo za hadhi na kuvivalia hivyo vitambaa?

Mwanamume kamili hana budi kumpa mke mawaidha na mwelekeo utakaomfanya mtu wa hadhi mbele ya watu, tena mke wa thamani! Ishara ya upendo ni kudumisha nidhamu na heshima. Mwenye kukuridhia kuvalia kama hawara si mwanamume ila gumegume! Katika kufanya hili, wengi watasema kwamba wanaonewa na kudhibitiwa na wanaume. Lakini heri mwanamume anayekuonya kuliko anayekunyonyoa.

Jamani, aibu kwa mtoto wa kike ni ngao! Angalau ajue vipi vya kuficha na vipi vya kufichua! Lakini leo, wengi wanasukumwa na wanaume kuvalia mavazi wasiyojua maana. Mtoto wa mtu na dodoki zote nje. Amevalia wari si wari! Mwenyewe hawezi hata kuinama. Ndani ya gari kuketi balaa! Wakiulizwa wanasema wanavalia angalau kuwafurahisha wanaume wanaowafadhili. Isitoshe, watu wazima wananunuliwa vijiguo vya watoto wadogo.

Mbona kumridhia mke aliyevalia vibaya?

Kwa nini mwanamume kumridhia mke kuvalia kijiguo kama kwamba hajui sehemu nyeti za kike zi wapi? Isitoshe, mumewe huna haya kumtembeza barabarani na kijiguo kilichokaa juu ya makalio utadhani mkia wa mbuzi! Heshima hiyo kweli? Watoka nyumbani na mke kwenda kupanda gari la umma, lakini mke hawezi kuketi bila kipochi pajani! Kwa nini kuona haya ilhali ulijua wazi athari ya mavazi duni uliyovalia?

Sauti ya mwanamume kamili ni sheria! Ukisema umesema! Kama mke hajavaa nguo ya heshima na stara, hatoki nyumbani! Ndiyo hadhi ya mwanamume! Akivalia vibaya, mwambie ukweli kuliko kumficha! Lakini sivyo mambo ya leo. Kila mke anavalia anachopenda na kwenda anakotaka. Mume hasemi kitu.

Kaka zangu, nawapasha mpashike! Lazima wake zenu waache kuvalia nguo za chumbani barabarani. Eti kwenda na wakati? Maumbile ya kumfaidi mumeo ndiyo sasa raha ya wapita njia! Hadhi na thamani ya mke ipi? Ndiyo sababu kuu uchumba wa siku hizi umekosa neema. Mume hajakuoa na tayari hakuna siri asojua mwilini mwa mke! Mkiachwa mataani mwasema mwaonewa!

 

 

 

Hebu niambieni, sababu za kuoa wake wawili ni nini hasa?

Na CHARLES OBENE

Imepakiwa - Wednesday, August 26  2015 at  13:16

Kwa Muhtasari

Furaha ya mke ni kumtunza ipasavyo ili kumwondolea ujuha, ushamba na utoto aliolelewa nao; angalau kumfanya mtu mbele ya watu!

 

WAHENGA walituonya kwamba, ari ikithiri huhasiri. Isitoshe, mshika mawili moja humponyoka!

Kwa hakika, tamaa na hamu ya uroda kwa wanaume wa leo zatufedhehesha na kutuzidishia dhiki katika familia.

Utamu wa mke sio huba na usuhuba pekee. Furaha ya mke ni kumtunza ipasavyo ili kumwondolea ujuha, ushamba na utoto aliolelewa nao; angalau kumfanya mtu mbele ya watu! Ili kutimiza lengo hilo ipasavyo, mwanamume kamili anahitaji mzigo unaobebeka. Mke mmoja pekee ni mzigo usiochukulika. Je wa pili?

Jambo la kusikitisha zaidi ni kwamba, kaka zetu wanaishi maisha ya sina sinani. Eti dunia haina shaka raha i mbinguni! Hawajali kifo hawaogopi mauti. Raha wanaponda na karaha kumumunya! Huo ndio ujinga wa samaki kufuata chambo! Sikutarajia kuwaona wanaume mwenye akili wakitanguliza mbele tamaa na ari ya kutaka kumiliki himaya ya wanawake. Hatima ya tamaa ni mauti

Vinywa vya waja vingali vikipovuka na mjadala kutokota. Wanaume wanateta kwamba sheria zinawadhulumu kwa kuwanyima nafasi murua ya kuoa idadi ya wanawake wanaotaka. Wanataka kuridhiwa kuoa si wawili si watatu si wanne. Maajabu hayaishi duniani. Ajabu ya wanaume kulilia kitanzi!

Sababu ya kutaka kuoa wanawake wengi ni ipi? Eti idadi ya wanawake ni maradufu ile ya wanaume. Hivyo basi sharti kila mume ajizolee wawili watatu angalau kupunguza mahambe na mashangingi wanaoranda mitaani bila madume! Eti wanataka kuwapa wanawake kazi za nyumbani ili kudhibiti vibiritingoma wanaovuruga nyumba za watu.

Wazo nzuri ila mbinu mbovu! Hiyo siyo akili ya mwanamume kamili. Ninakataa katakata, nakemea kwa nguvu zote fikira hizo potovu. Napinga mawazo hayo duni ya wanaume wa leo. Hizo ni fikira za kitoto, tena zinazoongozwa na tamaa. Kabla hujampa mwingine kazi za nyumbani, yule mmoja aliye nyumbani umemfanyaje?

Katika dunia ya leo; dunia isiyo na hali wala mali; dunia ambayo kila kitu ni ghali; mwanamume atafanyia nini wanawake wawili? Atawalisha na kuwavisha vipi? Atatoshelezaje mahitaji lukuki ya wanawake wa leo? Kaka zangu hebu nikawajuze! Mke hali akashiba chicha na jasho la gizani. Msitangulize tamaa ya kutaka majumba mengi ya uroda ilhali wenyewe ni masikini mende.

Kinaya

Nikitazama wanawake walioolewa hivi leo; naemewa kwa huzuni! Lakini mume wake yuko hai; tena anatafuta mke wa pili! Hizo ni ishara tosha kwamba wanaume wameshindwa kumtunza hata mmoja! Je, wa pili na wa tatu wataishi vipi?

Wanaishi kwa dhiki huku wakila kwa kudura za Mungu. Wanavaa mavulio, tena zilizochanika. Nyusoni ni mabonde ya chunusi, moyoni ni huzuni na mawazo tele. Ngozi imejaa vipele. Nywele ni kama chaka. Kwani hao wamaotaabika si wanawake? Wa kunyonga huwezi sembuse wa kuwinda?

Walioolewa wanasaga meno kwa mzigo mzito wa malezi.

Hawamwoni mume wa kuwapa nguvu na kuwaunga mkono. Inahuzunisha kuwaona wanawake wakitafuta vibarua vya kufua nguo au kupiga deki nyumbani kwa mabwenyenye ndipo watoto wale.

Eti lazima mke ajichuuze kwa wenye pesa ndipo wanawe wasome. Hao wanaotaabika si wajane. Dume liko hai; tena linatafuta mke wa pili! Hizo ni ishara tosha kwamba wanaume wameshindwa kumtunza hata mmoja! Je, wa pili na wa tatu wataishi vipi?

 

 

 

Mnaoita wanaharamu, nani kawaharamisha?

Na CHARLES OBENE

Imepakiwa - Wednesday, August 12  2015 at  13:18

Kwa Muhtasari

Haramisheni tendo siharamisheni watoto!

 

UKIPENDEZWA na boga sibague majani yake! Lililompata mburukenge jangwani laweza kumfika mamba kidimbwini. Situmie mzigo wa mwenzio kama kiboko cha kumdhalilisha.

Mapenzi ni muamana tena ridhaa baina ya watu wenye utu wala sio watu wenye uchu. Haramisheni tendo siharamisheni watoto! Sistahimili watu wazima kuzozania malezi ya mtoto asiye na hatia.

Kweli, kupenda ni sawa na kutembea kwenye kiza totoro lisiloruhusu jicho kupenya na kuona mbele ya ncha ya pua. Mja aliyegubikwa na wingu la penzi hana uwezo kuona ukweli sisemi kutathmini hatari inayomkabili mbele. Lau wanaharamu wangalijua ubaguzi na dhuluma zinazowasubiri wasingalithubutu kuzaliwa wakiwa hai! Hata hivyo Mwenye kukupa mwana atakupa na fungu lake! 

Wenye mizigo ya malezi ya wanaharamu si haba. Nasema nao – wao hao waliojasirika kubeba misiba ya ujanani – zao la ulimbukeni kujifanya wajuaji katika dunia ya waja wepesi kula vya watu kabla kutokomea na kuwaachia zigo la malezi. Kama hujanipata wewe ni koroma vuta subira kupevuka na kuwa nazi!

Tatizo ni kwamba wanawake kwa wanaume hudanganywa tena huhadaika wakaingia kwenye uhusiano au hata kuolewa na kuoa wenzao ambao mwishowe hukataa kuwajibikia “wanaharamu!” Jambo hili lanipa uchungu wala sina nguvu kuhimili chozi. Kovu la kuumwa na joka halijanipona. Ndio maana ung’ong’o wanizulia vimbimbi mwilini.

Malofa hawa wanajifanya kupenda boga lakini kamwe hawataki kuwajibikia majani yake. Vipi? Vipi utamwoa mwanamke na mwanawe; mwishowe ukamgeukia mwana na kumdhulumu huku unatarajia mapenzi kutoka kwa mamake?

Eti kwa sababu mke amekwisha kukuzalia “wanahalali” sasa unawaona “wanaharamu” si watoto! Kweli? Zindukeni. Mapenzi utakayompa huyo mwanaharamu ndio utakayovuna wewe! Ndugu zangu, simezi mate bure. Hujaona dunia na vimbwanga vyake!

Wajua tena dhuluma wanazopata hawa watoto wanaoitwa wanaharamu – siijui nani kawaharamisha! Si vijembe si dhihaka. Si makonde si mateke. Si kubaguliwa hadharani. Si kunyimwa haki na mahitaji ya kimsingi!

 

Lazima kutoa chozi

Eti mwanaharamu hapati kitu hajakitolea chozi. 

Simdhulumu “mwanaharamu” na kumdekeza “mwanahalali!” Urefu wa mti si ugumu wa kunge. Waweza kukataa jiwe mwishowe likawa msingi kukufanya mtu mbele ya watu. Niulizeni mimi mwana mpayukaji – kakopolewa katika mapenzi ya ujanani, kazaliwa ndani ya dhiki na kulelewa kwenye vichaka vyenye miba. Sisemi kitu zaidi ya hapo!

Ndugu zangu, mabikira si haba. Jipe raha kuufungua dibaji na kulisoma buku lako wewe na wewe pekee. Hakuna haja kumpa mke vikwazo na vitisho eti kwa sababu unamwajibikia mwanaharamu wake. Dunia ni huru na mwanamume ana uhuru kumtafuta mke asiye na watoto. Lakini situmie ila kumdhulumu na kumkwaza “mwanaharamu” asiyejua mwanzo na mwisho wa mapenzi yenu.

Mungu si Athumani. Hujui na hutayajua yaliyo mbele. Simdhulumu “mwanaharamu” na kumdekeza “mwanahalali!” Urefu wa mti si ugumu wa kunge. Waweza kukataa jiwe mwishowe likawa msingi kukufanya mtu mbele ya watu. Niulizeni mimi mwana mpayukaji – kakopolewa katika mapenzi ya ujanani, kazaliwa ndani ya dhiki na kulelewa kwenye vichaka vyenye miba. Sisemi kitu zaidi ya hapo!

 

 

 

Kula ushibe lakini tarajia kishindo pindi mnapokosana

Na CHARLES OBENE

Imepakiwa - Wednesday, August 5  2015 at  12:29

Kwa Muhtasari

Safari ya huba inavutia kwa wapendanao lakini linapozuka jambo ndipo utajua mwanamume wa leo kama dunia rangi rangile hasa pale dunia nzima itashiba hadithi jinsi ulivyo degi bovu tena kinu kisicho ukingo unaokaba mchi.

 

KILA mwanamke ameumbwa kwa namna ya kipekee na kutunukiwa vipawa visivyofanana na mwingine. Ole nyinyi kina yakhe mnaosumbukia tu miili inayozinga! Hivyo basi hakuna mke asiyependeka wala hakuna asiyependeza. Hutegemea hasa ukomavu wa mwanamume hali kadhalika lengo la uhusiano.

Sijui vipi kumjuza mwanamume wa leo! Mwanamke anastahili sio tu upendo wa dhati, bali pia imani thabiti kama ithibati ya upendo. Hakuna cha ziada anachothamini mke zaidi ya uthabiti! Yaani hakikisho tosha ya mstakabali mwema maishani. Hapa nazungumzia wanawake wa hadhi wanaojua maana na thamani ya kuvalia taji la mke! Aha! Kwenye harusi ya mamba wamo mijusi!

Lakini imani haiji kwa kuvizia wala haimo katika husiano za kisasa. Kwa nini? Kila mmoja yumo hayumo katika uhusiano. Isitoshe, kila mmoja analenga kujinufaisha binafsi sisemi kufaidi kwa jasho la mwingine, tena haraka iwezekanavyo. Utapeli huu ndio kizungumkuti kinachozungusha na kuyumbisha maisha ya wanawake kwa wanaume wa leo.

 

Dhana potovu

Kosa kubwa linalohujumu maisha ya wachumba na wanandoa ni dhana potovu kwamba wapo wanawake bora kuliko wengine. Kibaya chako chema cha mwenzio! Simameni kidete enyi mnaodedea maana mwilini mwa mke hakuna dango eti kila mmoja atalenga shabaha na kwenda zake! Na ikiwa utakwenda kwa raha zako, jamani mwenzio usimfedhehi kwa vijembe na kutangaza ulimbukeni wake! Ya siri ni siri!

Upendo unaposhamiri, wanaume wa leo hawachelei kudhihirisha furaha na bashasha ishara kwamba wapo ndipo, tena walipodhamiria kuwepo! Faraghani na hata hadharani hakuna linalofichika. Si mahaba vijiani, si kushikana vitangani si mwana kuliwa na kumla mwenzake!

Lakini subiri lizuke jambo ndipo utajua mwanamume wa leo kama dunia rangi rangile. Dunia nzima itashiba hadithi jinsi ulivyo degi bovu tena kinu kisicho ukingo unaokaba mchi! Na hilo ndilo tatizo kubwa la mwanamume! Mwingi wa vitimbi na sarakasi za mapenzi. Hadaa zote zinalenga tu kuliambua tunda na mwana kumwachia zigo la akili zito.

Tahadharini nyie wepesi kushawishika na hadaa za wanaume. Leo atakuimbia nyimbo za kukuloesha pangoni lakini kesho hutadiriki kutoka pangoni kwa fedheha alizokupa! Hapo ndipo utasikia, “alikuwa demu wangu yule!” Ole nyinyi mnaodhani hiyo ni sifa. Demu ni nguo mbovu na kuukuu iliyochanikachanika! Amekwisha kukuchana, kweli!

Majina ya kimahaba

Mwanamume wa leo atakusifu kwa majina ya kimahaba maana keshaona njia ya kutimiza haja sisemi kukupapasa paja. Atakufaidi kwa lishe na mavazi angalau kukuondolea shaka hasa nyinyi vicheche mnaopenda vibanzi kwa kuku choma! Kula na ushibe lakini tarajia kishindo punde tu mtakapokosana! Dunia nzima itajua jinsi hushibi hushibishwi!

Jamani kina dada, mwanamume sio mumeo na hathamirii kuwa. Hujui kwao naye hana haja kujua kwenu. Mmekutana kisadfa tu. Haja gani wewe kujipendekeza kama dawati lisilochagua makalio? Mume kama huyo ana haki gani kukutambalia na kukutandaza kama bustani?

Haya ndio mahaba yanayowapa wanaume nguvu kuwatenda kinyama kisha kuwakejeli kwenye mitandao! Anazo sababu zote kukuita kicheche au changudoa mbele ya umma maana keshakudona bila gharama.

Ole nyinyi mnaoshughulikia sana sura na ngozi kuliko akili na ubongo! Mwili na umbo lako litamzingua tu mwanamume kwa kuwa anasubiri sega kukoleza uki.  Yote hayo ni kwa muda tu dada! Ndio kwanza mkoko kualika maua.

Subiri kuchanwa na kuchambuliwa kama mhogo! Subiri vijembe na kebehi zitakazokutoa chozi!  Subiri kutangazwa na kusemwa kwa waja na wahujaji! Mwanamume dawa, tena sumu!

 

 

 

Mke mwema ni hekima, sio paja lichumalo hela

Na CHARLES OBENE

Imepakiwa - Wednesday, July 22  2015 at  10:14

Kwa Muhtasari

Mapenzi yamegeuzwa biashara; huba ndio bidhaa, mwanamke ni muuzaji na mwanamume ni mnunuzi.

 

NDOA sio mnara wa Babeli; kila mwenye kinywa kupaza sauti na kusema kwa raha zake! Ndoa sio soko la mnada; kila muuzaji kuchuuza kwa uwezo wa koo lake!

Ndoa ni maisha ya raha wawili kuridhiana, kupendana na kupendezana.  Nachukizwa mno nanyi wenye vijembe midomoni raha kuropoka kama nyuki mwenye usena. Mke mwema nguvu zake hekima wala sio paja lichumalo hela.

Madaraka ya kuongoza na mamlaka ya udhibiti wa familia zipo mikononi mwa mwanamume kamili. Nasema yote kwa ukakamavu tena kwa heshima ya hadhi nikitambua umuhimu wa mwanamke katika familia. Nafasi yake ni ya kipekee na jukumu lake ni maalum! Hilo halihitaji mjadala. Tatizo ni kwamba mwanamume wa leo amekwisha mzoesha mwanamke tabia zinazodunisha uchumba na kuchefua ndoa.

Zipi hasa tabia hizi? Mwanamume wa leo amezoea hasa kumhonga mwanamke ili kushawishi hisia zake na kupata anachotaka kwa njia rahisi tena za mkato. Si zawadi za thamani si ziara za kitalii si pesa taslimu si mahaba ya hadaa si ahadi za uongo. Vyote vimechangia usalata na mahaba yanayotanguliza pesa na maslahi mbele.

Kama sio hongo, mwanamume wa leo mwepesi kufidia mwanamke kwa “kazi nzuri katika jukwaa la mahaba!” Baada ya burudani mwanamume hachelei kutoa “shukrani za dhati” kama ithibati ya upendo. Tatizo hasa ni kwamba kuhongana na kufidiana kumeibua mapenzi hadaa yanayozingatia mahitaji na maslahi kuliko uhalisia na hisia.  Mapenzi yamegeuzwa biashara; huba ndio bidhaa, mwanamke ni muuzaji na mwanamume ni mnunuzi. Asiye na mikwanja aeleke baridi!

Kulikoni siku hizi? Mafunzo ya unyagoni yamepuuziliwa mbali na mambo ni huru huria. Kila mwenye mali yupo sokoni na mwenye haja yu radhi kutia guu mnadani ilmuradi mfuko unamtosheleza. Siwalaumu nyie mnaofanyia mili biashara. Mbona mtu afe njaa na mgodi kaukalia?

Utapeli huu ndio kwanza umechangia watu kuoana na kuzalishana pasipo kusudi wala lengo madhubuti. Leo wataoana kwenye magoma na harusi za kufana na kesho watatifuana kwa mapanga na magumi.

Sina kinyongo

Sina kinyongo kwenu mnaokula nyevu. Lakini niepusheni zenu fedheha na vitimbi vya ndoa za hadaa.

Asiye na hamu hawezi kuiona tamu. Lakini vitamu vi wapi katika tunu za mahaba yasiyo heba? Vilivyodhaniwa vitamu  ndivyo hivyo tunavyovinunua tena kwa mikopo ya benki. Lau sio fedha utamu wangeupata wapi wanaume wa leo?

Nyie wenye pesa sikilizeni kwa makini. Nanyi wenye mali na mili tulieni nikawajuze ya hekima. Mihogo ya kuchemsha ni tamu licha ya kuwa haina viungo wala vikolezi! Mwanzo wa tamu  ni hamu. Utamu wa uchumba upo kwenye hamu ya ndoa.  La msingi ni kuheshimiana, kuelimishana na kufaana kila hatua maishani.  Mahaba ya kulipia hayana hadhi wala ladha. Acheni ugumegume.

 

 

 

Kula raha kiholela kwaweza kukuachia shubiri kinywani

Na CHARLES OBENE

Imepakiwa - Wednesday, July 8  2015 at  16:53

Kwa Muhtasari

Mwanamume kamili, siku za mavuno sisahau kujenga ghala. Sisahau hekima ya kula kidogo; na kidogo kibindoni.

 

RAHA ya mwanamume ni kula jashole! Hivyo ndivyo walivyosema wazee wa jadi wenye hekima. Baada ya tangatanga juani, kila mja hufurahia kula mazao ya juhudi na matunda ya bidii yake. Na mwanamume wa leo ni mja anayependa kula vyake! Mimi sina kinyongo wala gere mtu kula vyake. Lakini ipo siku ya mume asiye na akili kula mawe!

Dunia ya leo haina uhakika na mwanamume hana uwezo kuihakiki. Kula raha kiholela kwaweza kumwachia mwanamume ladha ya shubiri kinywani. Nawe usiwe limbukeni kuuliza; vipi?

Tazama waliozama wasiibuke katika kilindi cha ufukara japo walikuwa watu miongoni mwa watu. Walikuwa navyo tena vingi usiweze kuvihesabu.

 

Kidogo kibindoni

Mwanamume kamili, siku za mavuno sisahau kujenga ghala. Sisahau hekima ya kula kidogo; na kidogo kibindoni.

Huna budi kujenga hazina thabiti na kuekeza katika miradi inayolipa. Mwanamume kamili ni ishara ya uthabiti na maisha mema kwa familia.

Hivyo basi chuma mali, hifadhi kwenye hazina ya familia na ekeza kwa manufaa ya siku za usoni. La sivyo wewe ni miongoni mwa hao watakaofanyiwa mchango wa mazishi!

Ngao ya mwanaume kamili ni nguvu za wanawe. Inasikitisha mno kuona wanaume wa leo wakila raha na mashangingi ilhali watoto waliozaliwa kwa mapenzi ya mume wanatanga wasijue nani baba nani mjomba!

Kila mwisho wa mwezi, mabaa yamejaa wanaume walio radhi kutumbuiza makahaba badala ya kuekezea watoto.

Madanguro hayaishi sura za wanaume walio mbioni kunusa na kubisha milango za pachipachi utadhani wanasaka uhai!

Nachukizwa na hali ya leo. Huku miji imejaa bashasha za wanaume wenye pesa, vijiji hakwishi vilio vya wanawake na watoto waliosononeka kwa kutelekezwa.

Hawana kitu. Si nguo si chakula si malazi si nyumba. Usidhani ni wajane na wanao! Ni mabibi ya wanaume wasiotoka kwenye mabaa. Ni familia za wanaume wanaoranda kwenye vijia vya giza wakifukuzana na makahaba.

Binadamu si makinda

Binadamu sio makinda eti watavuna kutoka shamba la mhisani. Mtoto anahitaji zaidi ya maponeo na mifupa tunayonunua angalau kuwahadaa kwayo! Mwanamume wa leo anazo nguvu za kujitosheleza. Tatizo ni ulimbukeni na utapiangono. Hatuna muda kuwakuza wanetu lakini tuna wakati wa kukesha kwenye mabaa tukiponda raha na kupapasana na makahaba! Kinaya cha maisha ya mwanamume wa leo!

Mwanamume kamili hujitahidi kula na familia wala sio kula na kulisha mashangingi!  Kula ni lazima. Lakini kula na ulishe jamaa na familia watakaomakinika kuunyanyua mwili wako baada ya kuondokewa na roho.

Usile nao kina yakhe wanaokuimbia nyimbo za hadaa kwa lengo la kuvuna masurufu kutoka kibindo ulichokitolea jasho. Angalau watoto na mke wako watavimba macho kwa kwikwi mazishi yako!

 

 

 

Nyege ni kunyegezana, kwa nini asiwe mke wako?

Na CHARLES OBENE

Imepakiwa - Wednesday, February 4  2015 at  12:02

Kwa Muhtasari

Mwanamke wa kunifanya mtu mbele ya watu kwa nini nisimpe mwili, roho na nafsi yangu? Kwa nini nisijitolee kufa kupona angalau kumfaa jinsi alivyonifaa? Kwa nini nisimfanye mke na mtu wa hadhi. Nyege ni kunyegezana.

 

PENZI tamu haliuzwi dukani wala kuchuuzwa kitandani. Thamani yake haijui sarafu wala noti; katu hainunuliki! Penzi kama halua, haijui ladha wala vilombamchuzi. Ole nyinyi wajanja mlozoea kuhonga na kuhongwa.

Wanadamu ni wajanja na mwanamume wa leo ni mjanja upeo wa ujanja! Hivyo basi tahadharini enyi goigoi, kina yakhe mnaopenda kuzoa vya bure. Makinikeni kutafuna na kula vyenu halali msije lizwa chozi kwa majuto na sononeko moyoni. Vya mwanamume wa leo, huli ukala mara mbili! Na iwapo utakula, nawe ni mliwa. Mwana kindakindaki ndiye huzoa kisonoko.

Mbona mwalalama na kulialia enyi mnaolilia wanaume? Mbegu mbovu mlizopanda harabu ya shamba! Ukweli wa mambo ni kwamba waweza kujitolea mhanga kumhonga mwanamume kwa shehena la mapenzi, tena mapenzi yaliyonoga bila kero wala bughudha, lakini kama wewe ni wa kuachwa utaachika na kilio cha mbwa mdomo juu.

Mwanamume hajakupa hata ukucha nawe huna soni kumzawadi mwili, roho na nafsi. Mwanamume hajui hata kitovu chako nawe huishi kujishaua kama ndama. Hajatangaza kusudi kukuoa nawe mtoto wa kike mwingi wa kilimilimi huna aibu kuvibeba vijiguo vyako hadi nyumba ya mtu. Akikutema kama mate jinsi wafanyavyo madume wa leo utamlilia nani?

Waweza hata kujimega kwa kisu ukampa roho yako lakini katu mwanamume wa leo haridhiki na hadiriki kula akashiba! Hana shukurani. Ukimpa hujampa yote sawa.  Ni nadra kumpata mwanamume anayejua maana na anayetambua hadhi ya upendo. Wanataka kuonja kabla kula na wakisha shiba huna chako mwana wa mtu. Ole ninyi wenye kuhonga.

Sijui wanajenga majumba ya nini? Kama sio kwenye mabaa, wanaume wa leo wako vilabuni wakinywa na kula kama fisi. Usiku kucha wako kwenye vijia vya giza wakizini na kula uroda na mahawara. Wako vijiweni wakila miraa utadhani mbuzi.

Kumhonga mwanamume wa leo ni kazi bure. Ukimtaka hayupo nyumbani. Akiwa nyumbani anashinda sebuleni hadi majogoo. Chumbani ni mwingi wa usingizi kama mzoga. Jukwaani  ni goigoi asojua mbinu wala nyenzo za mwana kumpa kumbo! Ole wewe mwana mtu mwingi wa hongo!

Wengi wetu masikini nyasi. Mwanamume jina.  Midomo ni sisi na sisi ni midomo. Matamshi ni utashi. Hatuna mbele wala nyuma. Lakini unyenyekevu uupate wapi? Kama vidonda, twavuja vinywani. Ndivyo walivyo wanaume wa leo. Ukishampa mapenzi na mwongozo akawa mtu mbele ya watu, hakumbuki tena ulikomtoa! Hakusazi kwa matusi na utashi. Hongo ya mapenzi ni ya nini ikiwa mtu hajui kukunyenyekea wala kukutumikia?

Mabwege hawa ndiyo kwanza wajeuri wasioambilika. Wakisaidiwa hawakumbuki. Wakipendwa hawamakiniki. Wakitoshelezwa hawaridhiki. Iweje wang’ang’ania kumpa mapenzi mtu mfano wa mzoga?  

Sijui kughilibu mapenzi wala kujipendekeza mbele ya mwanamke. Wala sina moyo wa huruma. Sijui katu kumsamehe na kusahau maovu ya dunia. Lakini mwanamke wa kunifanya mtu mbele ya watu kwa nini nisimpe mwili, roho na nafsi yangu? Kwa nini nisijitolee kufa kupona angalau kumfaa jinsi alivyonifaa? Kwa nini nisimfanye mke na mtu wa hadhi. Nyege ni kunyegezana.  

obene.amuku@gmail.com  

 

 

Wanaume wengi wamegeuka debe tupu

Na CHARLES OBENE

Imepakiwa - Wednesday, January 28  2015 at  10:39

Kwa Muhtasari

Wanaume wa leo hawajui kufunga vinywa au kuvuta subira. Hawajui stara kunyenyekea mbele ya watu. Wamegeuka debe tupu linaotika!

 

HAKUNA roho isiyokongwa kwa sifa nzuri. Kila mja hutaka kusikia maneno ya kunogesha, tena ya kumwondolea mtu taharuki na wasiwasi! Maneno yaliyotonewa nakshi ndio kwanza humpa mtu raha na kumwongezea hamu na hamamu ya maisha. Watu wazuri hutambulika kwa sifa nzuri. Na sifa nzuri zinaambatana na unyenyekevu.

Japo sifa za mtu ndizo humwangazia, twahuzunishwa mno na tabia za madume majisifu. Inachukiza upeo wa chuki kumwona mwanamume asiyejua stara ya ulimi. Midomo kufunguka tu, vijembe! Si mali, si rasilimali si maumbile. Mungu kakupa kila kitu kisiri. Iweje unawashwa midomo kututangazia? Mwanamume kuchuuza jina ni ulimbukeni. 

Jamani raha gani kuhadithia umma uwezo na nguvu zako?  Isitoshe, kuna haja gani kujichocha na kujishaua mbele ya vimwana? Kama kunena lazima, tueleze udhaifu wako. Tusimulie ulivyo juha, jura lisiloshika! Hilo ndilo gumu kuliona. Walivyosema wahenga, halua si haluli! Situjazie nta masikioni kusikiza mapepe yako. Mbona kutunywesha masuo nasi tuna vinywa kunywa yaliyo safi?

 

Stara

Wanaume wa leo hawajui kufunga vinywa au kuvuta subira. Hawajui stara kunyenyekea mbele ya watu. Wamegeuka debe tupu linaotika! Tabia hizi zinadhihirika hasa katika harakati za kujinasibisha. Mtoto wa mtu anayejua hadhi na heshima ya kike kamwe hatekenyeki kwa vijembe vya kijuha. Kumtongoza mwenzio kwa kujipalia sifa za uongo ni sawa na kumpa muye! Hujampa kitu ng’o!

“Mimi ndiye mkurugenzi wa kampuni hiyo maarufu!” “ Nilikuwa wa kwanza kuliendesha gari hilo!” Aha! Sifa za mwezi twaziona wala hatujamsikia akitamka neno. Wewe mja tu, una nini ambayo sharti ututangazie?  Kama mali, hakuna tajiti kuliko kanchiri. Humiliki himaya ya kifua tena kimyakimya!

Midomo inayokiriza kama simu hudunisha mwanamume. Ndivyo walivyo hawa wa leo. Wamegeuka kasuku kunya rasha ya maneno. Mwanamume kamili hana haja kupuliza tarumbeta mbele ya vimwana. Tabia za wanaume majisifu zinawapa wanawake jelezi na jekejeke bure. “Sisi tuna macho yanayopenya acha kuona! Hakuna haja kujinadi kitoto; kama unavyo, vitaonekana wazi.” Hiyo ndio kauli ya wanawake.

Hekima kwa mwanamume kamili ni usikivu na utulivu. Sifa za kujipa si sifa. Hawa wa leo wamempiku kasuku! Hakuna kitu wala jambo wasilolijua. Hawaambiliki hawashauriki. Hawawezi kukupa nasaha ila unyarafu tu.

Wawa hawa majisifu wana tabia ya kudakia mambo kivoloya. Mwanamume hawezi kumpa mwanamke nafasi angalau ayafanye mambo ya kike. Anajua kila kitu. Litaje, silitaje analijua. Mke ni wa nini ikiwa wewe ni mjuvi wa kila jambo? Kama kweli sifa unazo, mbona kuzitangaza? Kilichopo ki wazi. Kisichopo sikilazimishe!

obene.amuku@gmail.com

 

 

Mume wa leo ameweka mawazo katika korodani

Na CHARLES OBENE

Imepakiwa - Wednesday, January 21  2015 at  10:49

Kwa Muhtasari

Pesa zimekuwa adui sio tu kwa wanaume wa leo, bali pia kwa wanawake.

 

PESA zimekuwa adui sio tu kwa wanaume wa leo, bali pia kwa wanawake.

Zimekuwa sawa na uwele wa upele. Mwanaume akiwa nazo, huwashwa mwili akajiona mwenye raha isiyo kifani.

Ghafla anakuwa mtindi na mtiriri, raha yake kupapasa. Mwanamke naye akizikosa, anakuwa sawia na ngiri asojua njia yenye hatari na shari.

Hujawaona wanaume wenye pesa wanageuka jogoo kutweza na kutomasa kila kuku apitaye karibu nao?

Hujawaona wanageuka wafidhuli kama mbogo, kazi yao kugombana kama panya wanaoishi tundu lenye maji? Na wanawake je?

Wanasema heri kuuguza jeraha la moyoni na pesa kibindoni kuliko jeraha la tumboni kwa dhiki ya njaa. Falsafa yao!

Sijamwona hata mwanamume mmoja ambaye si msumbufu na msumbi baada ya kupata pesa. Kwa kawaida hujiona kafika kilele cha maisha yasiyo karaha.

Pesa humpandisha mwanamume wa leo madadi, akazama katika kilindi cha anasa sisemi kunaswa kwenye mitego ya mashangingi wala watu.

Pesa hulevya na kuwaacha wanaume bila tafakuri na tathmini ya maisha. Wangapi wamesahau na kutelekeza familia zao punde tu baada ya kupata pesa?

Wangapi wamepatikana mitaroni wakielea juu ya majitaka? Utamu wa pesa eti! Wangapi wamewaacha watoto wakiishi kwa maponeo wakahamia nyumba ndogo kwa mahawara kuponda raha na kula jasho lao?

Silaha ya kuwindana

Sitaki kulaumu pesa kama chanzo cha uozo katika jamii. Ndivyo walivyo wanaume wanaothamini pesa kuliko akili.  

Mwanamume wa leo ameweka mawazo katika korodani. Ameficha ubongo kwenye pachipachi za miguu.

Pesa zimekuwa silaha za kuwindana katika pori la mapenzi. Pesa ni chambo kunasia vimwana wenye pua za kunusa pesa.

Raha yao kubeba mikoba iliyojaa poda na wari kurembesha nyuso. Jamani watoto wa kike, tangu lini mwili ukawa chumo?

Imekuwa tabia ya wanaume kununua upendo kana kwamba ni bidhaa sokoni. Maelfu ya pesa zinapunjwa kuhongana kwa kusudi la kuhubiana.

Upendo hauna thamani tena kwa sababu bei yake tumekwisha ijua. Wenye pesa hawajali hawathamini tena hadhi, utu na nidhamu.

Wanaume wa leo hawajali kukuza utu na kumheshimu mtu. Ilmradi amekupa pesa, atafanya anavyotaka na kukufanya anavyopenda. Lipi litakalomzuia ilhali alikupa pesa ulizotaka?

Mtaliwa kinyama

Hapo ndipo njia panda alikofikishwa mtoto wa kike siku hizi. Pesa atazibeba, na maradhi vilevile. Ole nyinyi vimwana wa leo. Mwatafuta pesa? Mtazila lakini nanyi mtaliwa kinyama!

Watoto wa kike! Mume anakufadhili kututumua kifua chako ili akifurahie yeye. Anakuhadaa kuchubua ngozi angalau kufaidi weupe wa ngozi yako.

Kwani wewe huna akili kujua mbivu na mbichi?

Punde si punde utasalia na chuki na choyo huku umeparara kwa maradhi ya moyo na fadhaa za maisha.

Utu una thamani kuliko pesa.

Ndio sababu masikini ni wangwana kuliko wakwasi japo matajiri wana wafuasi; kupe wasio na utu; raha yao kujisabilia mikononi mwa wanaume kwa tamaa ya pesa!

Sina woga kufa na ukata wangu lakini simhini mtu utu kwa vichele vya pesa. Pendo lako si bidhaa, silipi hata shilingi!

obene.amuku@gmail.com

 

 

Mie kigae kidogo, katu sibishani na mfinyazi

Na CHARLES OBENE

Imepakiwa - Wednesday, January 14  2015 at  13:07

Kwa Muhtasari

Binadamu hajui thamani yangu! Sina haja wala kusudi kumkadiria. N’naridhika nilivyo! Natosheka moyoni.

 

BINADAMU hajui thamani yangu! Sina haja wala kusudi kumkadiria. N’naridhika nilivyo! Natosheka moyoni.

Sina ukamilifu, lakini naridhika kwa umakinifu alonituza Muumba. Mie kigae kidogo katu sibishani na mfinyanzi.

Wiki hii, nimekutana na watu wa ajabu waloniacha nimeachama.

Kwanza, nilikumbana na mwanamke wa ajabu. Shungi la nywele alilobeba lingempa farasi soni. Lakini zilikuwa gushi. Uso wake uling’aa kwa weupe wa ajabu.

Lakini mikono na miguu yake ingemfanya mamake mzazi kulia kwa uchungu.

Weusi ulikinzana na weupe na kumpa madoadoa ya pundamilia.

Nikakutana tena na janadume, barobaro mwenye misuli ting’inya.

Nywele zake kazitia rangi aina ainati. Kajipodoa na kujirembesha usingejua ni mwanamume lau misuli na kifua mlazo.

Athari za kemikali

Ngozi yake iliyometa juani ilidhihiri athari za kemikali zinazochubua na kubadili rangi ya ngozi.

Mwendo wake wa madaha uliwaacha wanaume wakishangaa jinsi dunia ilivyowakengeukia.

Sijui kapewa sijui kajipa ya Mchina! Lakini janadume lile lilijaliwa zigo la matuta yaliyojaa nyuma na ambayo yalipanda na kushuka kwa kila hatua aliyochukua.

Begani katundika kipochi. Mpaka leo sijaamini kwamba hakuwa mtoto wa kike.

Vilevile, sijaamini kwamba alikuwa mwanamume kamili.

Bura yangu sibadili na rehani. Alivyoniumba Muumba ndivyo alivyokusudia, ndivyo alivyodhamiria! Sina haja kung’ang’ania ya dunia kwa raha ya waja wasio na haja nami ila kunitafuna kama mua.

Hata nikipembejwa pajani, katu sibadili maumbile. Sipo katika harakati za kutafuta ukware kwa kujichubua ngozi na kujiumbua mwili. Binadamu wa leo wanasikitisha!

Sitafuti umaarufu

Nitajipa hamasa kuboresha hali na hadhi yangu. Katu sizidishi hangaiko kutafuta umaarufu na muhtaramu.

 Hata madodo ya kifuani yakimung’unywa mwishowe hulala sembuse mimi kijitu cha mchangani?

Rangi yangu ya jongoo ndio hadhi yangu. Ufupi wangu kama mahindi ya Katumani ndio nguvu yangu.

Ufyefye wangu wa ndama ndio kwanza hunizidishia wepesi.

Ole nyinyi mnaojaribu kukosoa kazi ya Maulana. Ole nyinyi mnaong’ang’ania jinsia. Mtashiba kemikali na kuzitapika lakini kamwe raha mtaisikia tu kama taarifa wala hamtaishika.

Binadamu haridhiki na maumbile

Ni ajabu kwamba binadamu wa leo haridhiki na maumbile yake. Wenye nywele za hudhurungi ndio kwanza wanazitia rangi. Si nyeusi. Si kijani. Si nyekundu. Si samawati.

Tazama vichwa na miili ya wanawake kwa wanaume na utashangaa jinsi binadamu walivyokosa na kujikosea heshima.

 Akili zangu timamu na firidi. Sitaki kung’ang’ana kuyapika mawe kwa kuni mbichi.

Kwa sasa mwatafuta raha na mvuto wa dunia. Subirini papo hapo mtakuja jionea yaliyomfika mwendazake MJ.

Hewa ya kuchunjwa haikutosha kumpa pumzi. Pua lilikataa katakata kutulia likabaki kutiwa na kutolewa... Sijui mashtaka aliyosomewa mbele ya Muumba.

 Lakini najua alituaga akiwa mwingi wa majonzi na majuto. Laiti angalijua yaliyomsubiri, asingalibadili ngozi yake ya mpingo.

obene.amuku@gmail.com

 

 

Mke si kinu kutwangwa kwa mchi wa maneno

Na CHARLES OBENE

Imepakiwa - Wednesday, January 7  2015 at  12:05

Kwa Muhtasari

Chambilecho wahenga, dharau ni dhara! Mwanamke sio jimbu lipitishalo maji ya mvua na majitaka vilevile. Kila jambo – bovu na baya lavurumishwa kwake! Kila tusi – haluli na hasiri laelekezwa kwake!

 

CHAMBILECHO wahenga, dharau ni dhara! Mwanamke sio jimbu lipitishalo maji ya mvua na majitaka vilevile. Kila jambo – bovu na baya lavurumishwa kwake! Kila tusi – haluli na hasiri laelekezwa kwake!

Mke sio kinu kutwangwa kwa mchi wa maneno! Shamba lenye kwekwe halistawishi mimea sembuse binadamu?

Jamani wanaume! Ugomvi, vituko na visanga vya kila siku vinaweza kummomonya mke akabaki gofu asiyethaminika. Hivyo basi kila mke anastahili heshima na taadhima. Anastahili malezi na mapenzi. Huu ndio ukweli unaopaswa kukita akilini mwa kila mwanamume kamili. Mwaka mpya mawazo mapya.

Bila shaka tumekumbana na kushuhudia madume yenye ufidhuli na bezo lisilo na mipaka. Raha yao kuwafanyia wenzao vitendo vya kususuwaa.  Hawaambiliki, hawasemezeki. Wamejaa ghiliba na ghururi. Si watu wanaoweza kutumaniwa! Ndugu zangu wenye tabia hizi potovu, makinikeni na staarabikeni!

Badala ya kufuswa na kufyonzwa kwa cheche za matusi kila siku; mwanamke mwenye bidii kukuza uhusiano na kuimarisha ndoa anastahili hiba, hidaya na himidi. Vijizawadi vya kumchahawiza na maneno matamu ya kumlainisha moyo. Anahitaji limbikizo la sifa na pongezi kochokocho kwa juhudi za kila siku. Hiyo ndio mbolea ya mke.

 

Muondolee hatihati

Kumpa mke hiba na hidaya ni njia ya kudhihirisha upendo wa dhati.  Ni njia ya kumpongeza kwa jasho alilotiririsha kustawisha na kufanikisha nyumba. Kumhimidia mke humchangamsha mbele ya wenzake. Vilevile, humwondolea mke hatihati na kumfanya kutulia nyumbani kwake. Nani asiyependa heba kama hiyo?

Kinaya cha mwanamume wa leo ni kwamba hana haya kula na kunywa na mahawara vilabuni ilhali mkewe amekauka midomo kwa njaa na kiu. Mwanamume wa leo hana soni kufuja sisemi kuvunja kingo za hazina kuwatumbuiza mashangingi wanaokula na kutafuna nguvu za wanaume vichwa pumba.

Yote haya ni kwa shangwe za hangahanga sisemi jazba za mpito wanazopata wanaume kutoka kwa vibiritingoma. Mwanamume kamili ni mwingi wa taadabu, tena mwenye kukuza taadhimu. Sifa zake adimu ndizo tija ziletazo raha kwa familia. Hivyo basi mbona kuzidisha vilio kwa vitendo vyenu vya kihuni?

Mwanzo wa mwaka huja na dhiki kwa watoto na wanawake. Huu ndio wakati wanaume huasi nyumba na watoto na kukimbilia nyumba ndogo. Watoto wa mashangingi wakifadhiliwa masomoni tena katika shule za hadhi, masikini wana wa mtu watahangaikia mavumbini na kususurika vijijini.  

Hakuna haja kujifanya mwanamume nyumba ndogo ilhali wewe ni gumegume nyumbani kwako. Kukuza dharau ndani ya nyumba yaweza kuzidisha madhara na kuleta maangamizi.  Bila shaka natumai mwaka mpya utaleta mabadiliko kitabia na kifikira.

 

 

 

Usiwe mzito kutafakari na mwepesi wa kunena

Na CHARLES OBENE

Imepakiwa - Wednesday, December 31  2014 at  15:04

Kwa Muhtasari

Napenda sana wanaume labizi wanapokutana na kuzungumza juu ya mambo kadha wa kadha. Mikutano baina ya waja ndiyo huchangia ukuaji wa akili na ukomavu wa fikira sisemi kuimarisha maisha ya mwanamume. Chuma hunolewa na chuma.

 

NAPENDA sana wanaume labizi wanapokutana na kuzungumza juu ya mambo kadha wa kadha. Mikutano baina ya waja ndiyo huchangia ukuaji wa akili na ukomavu wa fikira sisemi kuimarisha maisha ya mwanamume. Chuma hunolewa na chuma.

Napenda vilevile kusilikiza mazungumzo baina ya wanaume wepesi wa akili; wenye nasaha, hekima na taadhima. Napenda kubadilishana mawazo na watu; wadogo kwa wakubwa wenye ujuzi wa miaka na mikaka angalu kujifunza mbinu za kukabiliana na changamoto za maisha.  Siwezi kuwa mwanamume jalili pasipo hekima ya hao walionitangulia duniani. Wala sitaki kukumbana na maajabu ya dunia yatakayoniacha na kimako! Penye wawili hapaharibiki neno. Hiyo ndio hekima inayostahili kwa mwanamume kamili.

Kutia doa
Tatizo linalonikera ni kwamba wapo wanaume wanaopenda kujidunisha kwa tabia za kutia doa maisha ya wengine. Midomo kufunguka tu, mwanamume hutema cheche za chuki. Kazi yao hasa kukosoa, kudhihaki na kudunisha familia, wapenzi au hata wanawake ambao kila siku huwavulia na huwalilia. Mwanamume kasuku ni hatari mno. Wanaume hawa huchukua kosa la mke na kulifanya mada ya mazungumzo. “mke wangu mwingi wa shombo hunichefua badala ya kunifurahisha.”

“Mke wangu aliasi uroda nami labda amempata mwingine bora kuniliko” “Mke wangu limbukeni wa chumbani, hajui kitu!” “Mke wangu kilindi cha bahari, urefu na upana sina habari”

Mwanamume! Hata kama mkeo hulala chumba kingine mbali nawe, hayo ni mambo ya chumbani ambayo kamwe hayawezi kujadiliwa katika kongamano. Hayo ni ya wawili ambayo yanastahili kutatuliwa nanyi wawili. Tatizo kubwa kwa wanaume wa leo ni ulimi mwepesi kunena lakini ubongo mzito kutafakari kwa kina. Mambo ya ndoa si mzaha wa kupakana tope. Hekima ya mwanamume kamili ni kujua yapi yanayostahili kujadiliwa hadharani na yapi ya faraghani. Tendo la ndoa lina siri zake ambazo kamwe hazitoki nje ya kuta nne. Hii ni kwa sasabu kufichua siri hizo yaweza kuathiri kabisa uhusiano na kusambaratisha ndoa. Akija kujua mkeo kwamba yeye ndiye mhusika katika hadithi zenu, hutamwona wala kumwonja tena.

Jamani wanaume! Hata kama mwenzio hatosheki kula vyako, kuna haja gani kuwahadithia watu ambao hawajui umbo la paja sisemi upeo wa nyonga? Kwani huoni uwezekano wa kuwashawishi kina yakhe kukusaidia angalau kumtosheleza huyo uliyedai hatosheki?

Nilikuwa kwenye daladala nikasikia mume akimweleza rafiki yake, “nduru za mke wangu chumbani zimenichosha. Sijaanza shughuli, tayari yuko juu kama kengele!” Nikamgeukia na kumshauri kwa upole, ajaribu uroda na maiti! Wanaume wengine hawajui tofauti kati ya almasi na mawe.

 

 

Mnawaposa wakiwa mbichi na kisha kuwadhalilisha katika uzee wao

Na CHARLES OBENE

Imepakiwa - Wednesday, December 17  2014 at  19:10

Kwa Muhtasari

Enyi wnaume wa leo, sikilizeni hizi sauti za kina mama. Sauti za ndani kwa ndani zinazoashiria sononeko moyoni. Sauti za wanyonge wakilalama jinsi nyinyi mnavyowatenda na kuwatendea unyama. Hivi ndivyo vilio vyao.

 

ENYI wanaume wa leo, sikilizeni hizi sauti za kina mama. Sauti za ndani kwa ndani zinazoashiria sononeko moyoni. Sauti za wanyonge wakilalama jinsi nyinyi mnavyowatenda na kuwatendea unyama. Hivi ndivyo vilio vyao.

“Madume na majibaba wa leo, hongera kwa kudhibiti dunia viganjani vyenu. Hongera kwa hadaa zenu. Kweli, uwezo ni wenu kututenda sisi wenzenu mtakavyo. Lakini kumbukeni zipo siku za mnyonge kucheka na mdhalimu kufikicha macho kwa kilio cha majuto! Zipo siku za laiti ningalijua….”

“Wanyonge wanyongeni lakini nafsi siwapokonye. Vifyefye mvifinyange lakini hadhi siwavue. Sisi binadamu kama nyinyi japo uwezo hatuna kuwatenda na kuwabonda licha ya kwamba mwatuburura chini kama mizoga. Maisha yalikusudiwa kuwa yetu wawili lakini nyie weveru mkajipa na kutufanya wajinga kula sahani moja na vibiritingoma mitaani. Tumesalia na sononeko huku nyie wenye uwezo mkiwanda kama gugumaji.”

“Mwanamume mwenzangu, uliniposa mwana mbichi, ya dunia siyajui. Ulinibembeleza kwa ahadi kochokocho na zawadi zilizonifumba macho. Moyo wangu ukauyeyusha kwa nyama ya ulimi ulonilisha. Ukaniambia dunia ni yetu, raha ni yangu nivae nipendavyo. Mbona leo wanidhalilisha,kunivua nguo na nafsi hadharani. Unavyojidunisha, nami mwenzio nasononeka kwa dhihaka za dunia”

“Kwako nilikuja na kizinda cha ujanani. Ngeu ikanichiririka kwa raha ulojipa. Mengi ukanifunza na kunifanya mjuvi wa mambo kwa raha yako.

Mbona leo wanifedhehi kunitukana usiku kucha? Umenigeuza mlinzi kukusubiri usiku kucha. Nyumbani waja kwa ridhaa, tena kwa wakati uupendao. Si mke wa kubembelezwa tena mimi ila umenigeuza mtumwa wa kutukanwa na kuzomewa…”

“Mimba umenibebesha na kuniachia malezi na nasaha. Kazi za sulubu umenifanyisha kuwakidhia wanetu. Wewe na vimwana, vimwana na wewe. Pesa unazo wala hazitufai kitu. Hatuli vyako, hatuvai wala kujifunika hata kanga uliyotununulia. Umetusahau na kututenga kama wenye ukoma, kosa lipi heri ule vitamu vya watamu nami sinifanye shubiri!”

“Vidonda vimenijaa tumboni. Kovu limenikaa kwenye kilindi cha moyo na chozi halinikauki shavuni? Dhuluma zako zimenikosha wala huna haja kunifanya mtu mbele ya watu. Ndio mapenzi hayo?”

“Umegeuka msaliti kunilisha sahani moja na wanawake wenzangu. Umegeuka msabasi kunidunisha mbele ya wenzako. Umegeuka kasuku kuniumbua kwa usemi wa kinyaa. Umenigeukia kunigonganisha na mahawara na mashangingi. Umenipokonya imani kwako kadhalika sina imani na maisha yangu tena. Lau si usalata wako nisingaliathirika hivyo!”

“Ulinitoa kwetu pasi na kovu kwenye ngozi yangu. Leo sihesabu tena alama ulizoniachia kwa kichapo kama bafe. Mimi si mwingi wa makosa ila wewe hukubali kukosolewa. Sisi wamoja, mbona kuniweka pembeni kama pembe zisizoweza kushuka chini ya kichwa cha ng’ombe?” “Umebaki kula na kuliwa na kina yakhe ambao katu hawakutufaa kitu. Mbona nisione uchungu? Mbona nisikuzike angalau nijue sina mwanamume?

obene.amuku@gmail.com

 

 

Sihadaike na umbo, mke mwema ni tabia si sura

Na MWANAUME KAMILI- CHARLES OBENE

Imepakiwa - Wednesday, December 10  2014 at  10:00

Kwa Muhtasari

Mume wa leo balaa! Anavyozuzukia maumbile ya wanawake, utashangaa na kubaki kinywa wazi mdomo juu! Daima, tabia za mke ndizo kigezo cha kwanza! Utamjua mke mwema kwa tabia zake. Kama ni sura, hata chura anapendeza macho

 

Mume wa leo balaa! Anavyozuzukia maumbile ya wanawake, utashangaa na kubaki kinywa wazi mdomo juu! Daima, tabia za mke ndizo kigezo cha kwanza! Utamjua mke mwema kwa tabia zake. Kama ni sura, hata chura anapendeza macho
Mambo ya kuchanganywa na kuchanganyikiwa, tuwaachie wapishi wa pure! Ndio wanaojua vipimo vya mahindi kwa maharagwe vinavyounda angalau chakula kinacholika. Mwanamume kamili ni akili timamu.
Wewe mwanamume, mbona wachanganyikiwa na kuchanganywa na maumbile? Jana rangi ya ngozi! Leo sura! Kesho miguu! Kesho kutwa, umbo! Mtondo, uzito wa paja. Mtondogoo, sijui nyusi na kope? Jamani watafuta mke au sanamu ya kutundika sebuleni kufurahisha wenye macho?
Msijesahau kwamba sura ni kama ua linalochanuka asubuhi na kunyauka magharibi. Umbo halidumu wala halisitiri penzi. Punde si punde mashavu yatamomonyoka. Ngozi itaparara. Kifuani hamtabaki kitu ila malapulapu. Kama ni miguu, heri kuoa meza! Kuzuzukia sura zenye ucheshi, bashasha na tabasamu kama wanavyofanya wanaume wa leo ni ulimbukeni na uzuzu ambao daima huja na majuto.

Uzuri wa mkakasi
Nionyesheni mwanamke hata mmoja mwenye tabia mbovu aliyedumu kwenye ndoa kwa sababu ya kuwa mrembo wa kumithilishwa na malaika. Nionyeshe mwanamke hata mmoja aliyenogesha huba na upendo chumbani kwa kutumia sura yake nzuri! Ndoa kudumu ni tabia ya mke!
Sura si kitu, si chochote! Sijaona ratili inayopima uzuri wala ubovu wa sura ya mtu. Ole nyinyi kina yakhe mnaobagua wenzenu kwa misingi ya sura zao. Sura ingalidumu na ingalikuwa na thamani ya haja, basi shilingi isingalitoka mfukoni! Mwanamke ni tabia nyoofu. Kama ni sura, tuiachieni shilingi! Kama ni rangi tushamwona kinyonga, hiyo yako si kitu!
Mimi ningali mzazi! Sijamaliza mbegu zote kwenye koka wala sijui uzuri au ubovu wa sura fiche nilizobeba. Sijui uzito wa paja wala urefu wa miguu ya binti zangu. Na sitaki kujua! Jukumu langu kama mzazi ni kukuza binti wenye tabia za kunatia. Mwanangu utamposa nyumbani kwangu wala sio kwenye baa!Tabia zao jukumu langu, sura kazi ya Mungu.
Dunia ya mke anaitawala Mchina! Sihadaike na umbo. Huwezi kuwa na hakika na maumbo yaliyoviringa wala nywele zilizoshuka kama singa za farasi. Kucha, kope na nyusi si zake! Lau si viatu, mwenyewe mbilikimo! Uzuri wa mkakasi ndani kipande cha mti!
Kweli maisha kinaya! Waliopo hatuwataki, na wanaotaka tuwape tunawakagua na kuwabagua. Heri kuona kwa moyo kuliko uzuzu wa jicho!


obene.amuku@gmail.com

 

 

Mwanaume ni kichwa na shingo hana budi kubeba

Na CHARLES OBENE

Imepakiwa - Wednesday, December 3  2014 at  13:59

Kwa Muhtasari

Hata kichwa kikijaa kichaa kamwe hakiwezi kuchachawaa kikakataa kutulia juu ya shingo! Eti mwanamume kamili lakini huishi kutoka kamasi kama mwanambuzi anayeugua mafua

 

Hata kichwa kikijaa kichaa kamwe hakiwezi kuchachawaa kikakataa kutulia juu ya shingo! Eti mwanamume kamili lakini huishi kutoka kamasi kama mwanambuzi anayeugua

mafua! Kwa nini walizwa na vijimambo nyumbani kama kwamba hujui kazi ya bakora?

Kwa tetesi za kila siku, mwatutia kinyaa na kutufedhehi, sisi tunaowajibikia majukumu ya mume; tena tunaojua kuhimiza adabu na kushinikiza adhabu kali kwa wanaokiuka

desturi za nyumba. Nyumba zote zinazosimamiwa na mwanamume kamili daima hukuza vijiji vyenye waja wa heshima.  

Mwanamume ni zawadi isiyomithilika. Ni mwanzo na mwisho wa amri. Sauti na nasaha zake ni sheria isiyobatilika. Mwanamume ni kichwa na shingo haina budi kubeba!

Yeyote anayejua hadhi ya mwanamume daima anaithamini, anailinda na kuitetea kwa ncha ya meno yake!

Nidhamu

Nipe jicho na sikio ewe mume mwingi wa tetesi za kitoto! Mwanamke ulimchagua wewe! Ukamposa na kumridhia kuishi na kula nawe ndani ya nyumba yako. Iweje aje

kukuzungusha na kukuzonga na usichana wake? Kwani alisahau njia ya kwenda kwao? Ubishi ndani ya nyumba ni wa nini? Ikiwa mke hakufunzwa nidhamu na jinsi ya kukuza

nyumba ikawa kijiji, wasubiri nini kumpa somo la bure? Mtu kwa babake, tena alfajiri kwenye baridi; akajifunze nidhamu na heshima nyumbani. Kamwe hatorudia kusema bila

tafakari! Mpe majukumu kama hana kazi ya kufanya.

Ninaposikia kwamba mwanamke kamfungia mlango na mumewe akalala nje nalemewa na shehena zito ya huzuni. Heri hata panya wanaolala darini, angalau wanathaminiwa

kuliko mume anayezizima kwenye baridi shadidi nje ya nyumba yake. Hilo ni kosa la mume sisemi ujuha wake. Ukija kwako mlevi chakari akili ya pumba huku umejinyelea

kama ndama, wataka nani kukupokea begani? Lala nje ujifunze maana na mume!

Jamani wanaume! Kazini mwaraukia. Mishahara mwamalizia ulevini na madanguroni. Kodi wadaiwa! Watoto wanashinda nyumbani kwa kukosa karo. Chakula ni maponeo.

Hizo ndizo sababu zinazompa mke nguvu kukufungia mlango ukalala nje ya nyumba yako.

Mwanamume kudharauliwa ni ridhaa yake. Humwoni mke mpita njia ukamwacha. Raha yako kuzuzukia pachipachi na mapaja ya mahawara. Mtaa wote haushi kukusema

wewe. Hujasaza kuwapepeta wakongwe na vijitoto viduchu wenye pupa kupenda kupapurana! Ushawapa watoto na mke sababu zote kukusonya! Lakini mke kukusonya huna

nuksi wala shahawa ya mtu mbona asiokote meno sakafuni, na mzigo kwa babake?

Leo tunawaona kina mama na binti zao wakivalia kinyaa na hakuna mwenye kusema neno. Huwezi kutofautisha kati ya changudoa na mama wa nyumba yake. Ndivyo

wanavyopenda wanaume na baba zao. Wangalijua adhabu ya kuvalia vitambaa mwilini au kushiriki tabia za kikahaba, wasingalithubutu! Vitendo huonekana, siri imo moyoni.

 

 

Uvumilivu ni ngao, ukatili sio sifa ya mume kamili

Na MWANAMUME KAMILI - CHARLES OBENE

Imepakiwa - Wednesday, November 26  2014 at  15:38

Kwa Muhtasari

Ukimwona mwanamume mwingi wa lalama na tetesi, mwepesi wa hasira na mpenda vita tahadhari kabla hatari.

 

UKIMWONA mwanamume mwingi wa lalama na tetesi, mwepesi wa hasira na mpenda vita tahadhari kabla hatari.

Sharti wanawake kutahadhari na wanaume wenye tabia na ishara za kinyama. Wanaweza kukukatizia maisha ungali mwana mbichi.

Isitoshe, wanaweza kukupa donda la maisha lenye uchungu na majuto. Heri upweke kuliko ubishi na mume wa leo. Ndio ushauri nitakaowapa wanawake vichwa vya ngiri na midomo ya kasuku

Utulivu na ustaarabu ni vigezo kamili vinavyodhihirisha ukomavu wa mwanamume. Ukomavu unadhihirika katika vitendo na matamshi ya mume.

Matamshi ya mwanamume kamili sharti  yahimize unyoofu, yashawishi uugwana, yashauri bidii, yasisitize uadilifu na uajibikaji maishani.

Sharti mwanamume awe mfano mwema kwa familia na jamii nzima. Lakini sivyo alivyo mwanaume wa leo. Hasira kama mkizi. Matusi na utashi. Vitisho na hila. Nani haukulizwa na kisa cha huyo mzee wa miaka sabini kumwua mkewe kwa kumkatakata kwa upanga? Hakustahili kufa kwa ncha ya upanga masikini nyanya huyo huko jimbo la Busia.

Sitaki kutonesha vidonda vya moyoni hasa kwa familia zilizohasirika kwa mauaji ya kinyama yaliyotekelezwa na magaidi huko Mandera. Hiyo ni ishara tosha kwamba wanaume wa leo hawana upendo wala hisia. Si watu tena!

Wangalikuwa watu wenye utu, wasingalitekeleza unyama kama ule. Mja mwenzio hana kosa, huwezi kumwonea hata chembe cha huruma? Vipi mwanamume anaweza kumpiga risasi kwa raha zake mja mwenzake, hasa mwanamke?

 

Mauaji ya kinyama

Visa vya mauaji ya kinyama vimeripotiwa katika maeneo mengi humu nchini. Mara mwanamume kanyonga mkewe baada ya ugomvi. Mara mwanamume kateketeza wanawe baada ya ubishi na mke.  Mara mwanamume  kateketeza nyumba kwa kumshuku mke.

Sielewi jinsi mwanamume anavyoweza kuwageukia wanawe na kuwachanja mili kwa kisu au kuwatumbukiza kwenye kindimbwi cha maji.

Nini hasa sababu ya mume kuwatesa wanawe kwa kosa wasilojua? Visa hivi vinadhihirish jinsi mwanamume wa leo alivyopungukiwa na akili sisemi kukosa hisia za kiutu!

Uvumilivu ni ngao! Ukatili hauna nafasi katika maisha ya mwamume kamili. Najua ugumu uliopo kwa wanawake wa leo kutaka radhi au hata kunyenyekea. Lakini hakuna kosa la kibinadamu linalostahili adhabu ya kifo, tena kifo cha panga au risasi kichwani!

Tuukomesheni ujahili na ujinga wa jicho kwa jicho.

 

 

 

Uvumilivu ni ngao, ukatili sio sifa ya mume kamili

Na MWANAMUME KAMILI - CHARLES OBENE

Imepakiwa - Wednesday, November 26  2014 at  15:38

Kwa Muhtasari

Ukimwona mwanamume mwingi wa lalama na tetesi, mwepesi wa hasira na mpenda vita tahadhari kabla hatari.

 

UKIMWONA mwanamume mwingi wa lalama na tetesi, mwepesi wa hasira na mpenda vita tahadhari kabla hatari.

Sharti wanawake kutahadhari na wanaume wenye tabia na ishara za kinyama. Wanaweza kukukatizia maisha ungali mwana mbichi.

Isitoshe, wanaweza kukupa donda la maisha lenye uchungu na majuto. Heri upweke kuliko ubishi na mume wa leo. Ndio ushauri nitakaowapa wanawake vichwa vya ngiri na midomo ya kasuku

Utulivu na ustaarabu ni vigezo kamili vinavyodhihirisha ukomavu wa mwanamume. Ukomavu unadhihirika katika vitendo na matamshi ya mume.

Matamshi ya mwanamume kamili sharti  yahimize unyoofu, yashawishi uugwana, yashauri bidii, yasisitize uadilifu na uajibikaji maishani.

Sharti mwanamume awe mfano mwema kwa familia na jamii nzima. Lakini sivyo alivyo mwanaume wa leo. Hasira kama mkizi. Matusi na utashi. Vitisho na hila. Nani haukulizwa na kisa cha huyo mzee wa miaka sabini kumwua mkewe kwa kumkatakata kwa upanga? Hakustahili kufa kwa ncha ya upanga masikini nyanya huyo huko jimbo la Busia.

Sitaki kutonesha vidonda vya moyoni hasa kwa familia zilizohasirika kwa mauaji ya kinyama yaliyotekelezwa na magaidi huko Mandera. Hiyo ni ishara tosha kwamba wanaume wa leo hawana upendo wala hisia. Si watu tena!

Wangalikuwa watu wenye utu, wasingalitekeleza unyama kama ule. Mja mwenzio hana kosa, huwezi kumwonea hata chembe cha huruma? Vipi mwanamume anaweza kumpiga risasi kwa raha zake mja mwenzake, hasa mwanamke?

 

Mauaji ya kinyama

Visa vya mauaji ya kinyama vimeripotiwa katika maeneo mengi humu nchini. Mara mwanamume kanyonga mkewe baada ya ugomvi. Mara mwanamume kateketeza wanawe baada ya ubishi na mke.  Mara mwanamume  kateketeza nyumba kwa kumshuku mke.

Sielewi jinsi mwanamume anavyoweza kuwageukia wanawe na kuwachanja mili kwa kisu au kuwatumbukiza kwenye kindimbwi cha maji.

Nini hasa sababu ya mume kuwatesa wanawe kwa kosa wasilojua? Visa hivi vinadhihirish jinsi mwanamume wa leo alivyopungukiwa na akili sisemi kukosa hisia za kiutu!

Uvumilivu ni ngao! Ukatili hauna nafasi katika maisha ya mwamume kamili. Najua ugumu uliopo kwa wanawake wa leo kutaka radhi au hata kunyenyekea. Lakini hakuna kosa la kibinadamu linalostahili adhabu ya kifo, tena kifo cha panga au risasi kichwani!

Tuukomesheni ujahili na ujinga wa jicho kwa jicho.

 

 

 

Kumbikumbi pia hujawa na aibu, sembuse binadamu

Na MWANAMUME KAMILI - CHARLES OBENE

Imepakiwa - Wednesday, November 19  2014 at  17:06

Kwa Muhtasari

Nguo za mtu huficha siri. Wala hakuna mwenye radhi kufichua siri hiyo ila mwenyewe kwa hiari. Nalemewa kwa shehena ya soni na aibu kufuatia visa vya wanawake kuvuliwa nguo hadharani! Jamani hata kumbikumbi hujawa na aibu, sembuse binadamu.

 

Nguo za mtu huficha siri. Wala hakuna mwenye radhi kufichua siri hiyo ila mwenyewe kwa hiari.

Nalemewa kwa shehena ya soni na aibu kufuatia visa vya wanawake kuvuliwa nguo hadharani! Jamani hata kumbikumbi hujawa na aibu, sembuse binadamu?
Jamii zetu sio tena makazi ya waja wenye huruma na upendo. Kweli, tunaishi pamoja na hayawani, wanyama wa porini waliokosa sio tu hisia bali pia utu. Wanaume  zumbukuku – majuha – vichwa  pumba – waliochukua sheria mikononi mwao na kumfanyia unyama masikini binti wa mtu jijini Nairobi hali kadhalika Mombasa wanapaswa kutafutwa kwa kurunzi na kuchukuliwa hatua kali za kisheria. Napendendekeza adhabu kali kuwapa adabu.
Ikiwezekana, wanaume hao wazunguke jiji bila nguo angalau hata sisi tufurahie kuona hivyo vibanzi walivyobana pachipachini.

Baadhi yenu mkivuliwa mtajificha kwenye vidimbwi vya maji taka! Ndivyo! Jicho kwa jicho hupoofusha dunia. Heri dunia iliyojaa vipofu kuliko kuishi wa wanyama wasioheshimu nafsi na siri za wenzao. Mimi mwingi wa hamaki. Walinilazimisha kuona mambo sijazoea kuona ila kwa chabo, tena kwa ncha ya jicho tu.

Nadra kuona mambo haya. Hata nikiwa na radhi na hiari ya mwenyewe, bado mwili hujawa na vimbimbi!

Uhawayani
Sasa akili timamu za watoto wetu sio zao tena. Washaingiwa hofu, shauku na jazba. Wanatembea wakinyatanyata. Wanahisi kama kwamba hata wao wamevuliwa hadharani! Najua anavyohisi masikini mwanangu ila tu hawezi kunieleza! Aliona niliyoyaona. Alihisi nilivyohisi. Sote tulifikicha macho kuficha mhemko uliojaa moyoni. Wanaume wa leo sawa na hayawani!
Sio mara ya kwanza wanaume kufanya vitendo vya kihayawani kama hivyo. Imekuwa kama desturi hasa. Inawezekanaje wanaume watu wazima, tena wazazi waliozaa kuamua kwa pamoja kumteka na kumvua mwanadada hadharani?

Hilo halikutosha. Walimnyanyua hobelahobela, wakampapasa na kumtomasa sehemu nisizoweza kuzitaja. Yote hayo yalitendeka kwa manufaa ya wanaume waliofurahia sinema ambayo kwa hakika walipeza mno.
Mwasingizia tu mavazi duni ili kujiondolea lawama kwa ujuha mliotenda. Mwanamume wa leo hawezi kumwona mwanamke mbele yake asiwazie ila.

Hata kama kila mwanamke atavishwa kanzu inayomfunika tokea utosini hadi nyayoni, macho ya wanaume wa leo yatapenya na kutafuta walichobeba wanawake vifuani na makalioni.
Nani kawahadaa na kuwapa fikira potovu kwamba mavazi ya kike yanawalenga? Makahaba wamejaa mijini sio kwa kufurahia kuzizima mili kwenye baridi.

Ni biashara iliyofanikishwa kwa kuwepo wanunuzi si haba. Mmewazoesha kwa kuwalipa vichele vya pesa kuwatumbuiza wakiwa uchi wa mnyama kwenye majukwaa ya vilabu vya densi. Mbona leo kuwafedhehi mchana kwa kuwavulia nguo?

swahilihub@ke.nationmedia.com / mwanamume@yahoo.com

 

 

Mwanamume ni kudhibiti matamshi na fikra

Na MWANAMUM

Imepakiwa - Tuesday, November 11  2014 at  15:52

Kwa Muhtasari

Mwanamume si ndevu, kwani hata mbuzi anazo! Mwanamume kamili ni akili tulivu, mawazo chanya na vitendo vya hadhi.

 

MWANAMUME si ndevu, kwani hata mbuzi anazo! Mwanamume kamili ni akili tulivu, mawazo chanya na vitendo vya hadhi.

Mtulivu asiye mwingi wa makeke ndio mwanamume wa kukufanya mtu.

Hao waliomeza kanda na wanaotapika maneno ni makubadhi sisemi viatu!

Utamtambua mwanamume kamili kutokana na jinsi anavyojizatiti kudhibiti sio tu kinywa na ulimi bali pia hisia na fikira potovu.

Wacha watu wakuite maji ya mtungi lakini wasijue yaliyokuziba kifua.

Ndio maana kasuku hana uwezo wa kuoa licha ya kuwa mwingi wa maneno!

Bila shaka tunasikitishwa na wanaume majisifu. Yaani kina yakhe wasiojua kufyata vinywa na kudhibiti ndimi zao.

Neema ya ulimi hali kadhalika uwezo wa kuzungumza sio halalisho kwa mwanamume kupayuka na kuboboja kivoloya. Waishi wajisifu, ukiwa mfu waliohai watasema nini?

Mbele ya watu mwanamume kamili ni mnyamavu, msikivu na mtulivu. Hutumia muda wake kushika mawili-matatu kati ya mengi yanayosemwa.

Hawa wa leo wamempiku kasuku! Wanajifanya kujua kila kitu na kila neno. Hawaambiliki. Hawasemezeki. Hawashauriki. Nyumba haikaliki kwa kero na ubishani.

Mwanamume king’ang’anizi hatari! Anaweza kukupa shinikizo la damu kwa vijimambo tu.

Kinachowasha ndimi zenu nini? Jambo lisilowahusu mwaliteka na kujenga mada ya ugomvi kwalo. La mapenzi, mnalibeba begani na kujifanya mlivyo wembe wa kukata. La mekoni, mke hatoshi.

Sasa kila kitu ukijua wewe, mbona hilo la himila na kuzaa likakushinda?

Na sio kuzungumza tu inayoudhi.  Baadhi yenu mko tayari kutetea hoja zenu kwa ncha ya upanga.

Jamani nani anataka kuolewa na mwanamume asiyesikia wosia wala nasaha? Mie sikondi kwa kuzomewa na kubezwa siku zote. Kama ni asali zeeka nayo!

 

Kosa la nyumbani mnalitoa nje

Kuna hatari kubwa kuishi na mwanamume kasuku. Upendo hupungua na kukatika mara moja! Rahisi sana kutibua amani kwa ugomvi. Maamuzi ya nyumbani hayana maafikiano. Hakuna kujitolea kwa maslahi ya wawili. Hizi ndizo sababu za wengi kuchepuka na  kutafuta hifadhi na liwazo kutoka nje ya ndoa!

Woga ni ngao. Unyamavu ni hekima. Jamani tabia za kuwavua wenzenu hadharani mtaziacha lini? Kosa la nyumbani mnalitoa nje na kulijadili kwenye vikao vya walevi. Hizo tabia za wasusi na wasukwa, nyie wanaume mwazitoa wapi? Shombo na ulimbukeni wa mwenzio sio hoja ya kujadiliwa vijiweni.

Hata kama mkeo ni gogo lisilokwea na kushuka nyakati za haja za watu wazima, mbona msiyamalize hayo chumbani? Kweli hiyo ni hoja ya kujadiliwa kwenye kumbi za walevi?

Mpaka makeke ya ulingoni mwataja? Hizo ni akili za mwanamume au za samaki kumeza chambo?

 

 

 

Mwanamume gumegume hana shukrani hata chembe!

Na MWANAMUME

Imepakiwa - Wednesday, November 5  2014 at  12:02

Kwa Muhtasari

Jamani ewe mke mwingi wa chozi na masikitiko, mbona kujinyima usingizi wa pono eti walilia mwanamume aliyetelekeza nyumba?

 

JAMANI ewe mke mwingi wa chozi na masikitiko, mbona kujinyima usingizi wa pono eti walilia mwanamume aliyetelekeza nyumba?

Kwa nini ukonde bure kwa kuwazia na kumfikiria mwanamume aliyekwepa majukumu na kukuachia malezi ya watoto?

Badala ya chozi na sononeko, jinasue na jipe raha!

Walilia mtu angali hai, je mfu? Kuvunjika kwa mwiko sio mwisho wa upishi. Kuachwa na mwanamume ni kama champali kukatikia njiani. Nani kakatikikiwa champali akashindwa kufika nyumbani?

Ukweli wa mambo ni kwamba waweza kujitolea mhanga kumpa mwanamume mapenzi ya kilo, tena nafuu bila kero wala bughudha, lakini usishangae kumwona bwege akikutetesha kwa makeke na kelele kama kwamba hujamfaa kitu. Utampata madanguroni akitafuta uroda wa kupimiwa tena kwa malipo.

Waweza hata kujimega kwa kisu ukampa mikononi kijisehemu anachotaka lakini katu mwanamume wa leo haridhiki, hatulii, hamakiniki na hana shukrani. Hao ndio wanaume tunaolilia! Ni nadra kumpata mnyenyekevu, angalau mmoja aliye radhi kutulia nyumbani kwa maslahi ya wanawe.

Kama sio kwenye mabaa, wako mitaani na mijini kwenye vilabu vya pombe wakinywa na kula mfano wa fisi. Wako kwenye vijia vya gizani wakipokezana magonjwa ya zinaa na makahaba. Wako vigodani chini ya kivuli kwa hadithi na ngano za kisiasa huku mashavu yamejaa majani ya miraa.

Utampata mwanamume masikini nyasi. Ni mume jina tu. Anaishi sio kwa chakula bali maponeo. Anavalia shati na suruali moja akifua na kuanika utadhani mvuvi. Miguuni anavalia makubadhi yaliyolika nyayoni yakaemea ubavuni.

Ukishampa mapenzi na mwongozo akawa mtu mbele ya watu, ndiye wa kwanza kukugeukia na kukuponda kwa matusi yasiyoandikika.

Hawanitishii maisha hawa ndugu zangu. Wapo wanaume wenye misuli lakini chumbani hana jamvi sisemi kitanda. Hana kitu na hana uwezo wa kuwa navyo hivi karibuni! Hana mswaki sisemi dawa ya meno. Ole wewe mgeni mwenye meno ya kung’aa!

Mwanamke akajitolea kukuelimisha

Jamani wanaume wa karne hii, mna kichaa? Mwanamke akajitolea kukuelimisha kwa kusudi la kukufanya mtu wa hadhi. Mtoto wa mtu amekulipia karo na kukukidhia mahitaji. Lakini mwisho wa masomo unageuka mwenye mashobo usitake kumwona wala kumsikia.

Mtoto wa kike amekuvisha na kukulisha. Amekuvulia na kukufulia. Hakuna linalofanyika duniani ambalo hakuthubutu kwa maslahi yako. Mwishowe unashikwa na pepo wa huba na tamaa ya kipumbavu na kumwacha mwenzio eti hafai kitu! Kama kweli hakufaa kitu wala mtu, mbona muda wote ukamhadaa?

Sijui kujifanya wala kujipendekeza mbele ya watu. Wala sina moyo wa huruma. Sijui kabisa kumsamehe mtu.

Lakini mke wa kunifanya mtu mbele ya watu kwa nini nisimpe mwili, roho na nafsi? Kwa nini nisijitolee kufa kupona angalau kumfaa jinsi alivyonifaa? Nitaishi kwa yake maslahi.  Mwanishangaza wanaume wa leo!

mwanamume@yahoo.com

 

 

Raha za kuhubiana na kukwepa

Na MWANAMUME KAMILI

Imepakiwa - Thursday, October 30  2014 at  13:48

Kwa Muhtasari

Mwatudunisha mno kwa zenu raha za kuhubiana na mwishowe kuwakwepa wenzenu kama wenye maradhi.

 

Sura jaamali ni majaliwa.

Msinione sura mbovu mkadhani hakunipa Rabana.

Wala msidhani raha yangu kununa na kukereka kama sokwe mwingi wa nyege.

Nyie wanaume wa leo mwatuvunjia heshima.

Mwatudunisha mno kwa zenu raha za kuhubiana na mwishowe kuwakwepa wenzenu kama wenye maradhi.

Acheni niyatoe moyoni angalau msitishe hizi tabia za kuwapachika mimba wanawake ambao hawana haja kulea wala uwezo wa kuwatunza watoto.

Mwanamke kushika mimba asiyopangia wala kuhitaji inazidisha hatari ya uavyaji.

Wataavya, mpende msipende!

Mimba hizi za kiholela zinachangia pakubwa kuwepo watoto mitaani wanaoishi na kula mapipani.

Sio kosa lao kuzaliwa.

Ni kosa la mume na mke ambao hawakuchukua tahadhari.

Binadamu wa leo si watu.

Wanajua lakini hawataki kujua!

Ni kosa kwa mwanamke kutanguliza tamaa ya mwili na kushindwa kutumia akili.

Ni kosa la mwanamume ambaye kwa kupenda raha ya kufunga magoli hushindwa au hukataa kuchukua tahadhari kuzuia karaha ya matokeo mabaya ya mechi.

Wengi wa wanaume wa leo ni sampuli hii.

Wanakula raha na kila janajike lakini hawataki kamwe kulea watoto ambao ni mazao ya ulimbukeni wao.

Ndio sababu ya kesi mahakamani zisizokwisha.

Kukidhia mahitaji ya watoto nje ya ndoa imekuwa kama biashara; kila mmoja akitafuta mnofu mzito sisemi gala la kuchumia.

Ole nyinyi wenye kula uroda na kukwepa alfajiri!

Sitazungumzia sana uzembe na ujuha wa baadhi ya kina dada kujipendekeza na kujidekeza kwa wanaume wakijua wazi hatari ya ngozo za kiholela!

Naambiwa eti ni udhaifu wa kike kushindwa kukataa vya bwerere vikiwemo mimba na magonjwa ya zinaa.

Shauri ni lao!

Paka kubeba nundu la ngo’mbe ni ridhaa yake.

Mtu hujikwaa mara moja!

Mbona msijue mbinu wanazotumia wenzenu kuwanasa?

Mwanamke usiyemhitaji maishani wafanya nini naye chumbani kwako?

Nionyesheni mume aliyekufa kwa kupeza huba?

Lazima mwanamume kamili awe na mpangilio maishani.

Ajue wa kula na kusaza!

Mwanamke usiyempangia mema ya usoni anashinda kwako siku kadha akifanya nini?

Mwenzio umfyonze ladha kisha umteme kama ganda la mua!

Hata kama kajileta mwenyewe kama wanavyofanya kina dada wa leo, mbona usimwitie babake?

 

Kuokotana vilabuni

Mwanamumue kamili hufanya maamuzi ya busara.

Sitisheni tamaa na mdumisheni hadhi!

Hizi tabia za kuokotana kwenye vilabu vya walevi mtazikoma.

Nyote walevi tena vichwa pumba.

Saa ngapi mtakumbuka kinga?

Heri ukose kichwa lakini bakisha punje la ubongo angalau kuzuia majuto.

Kuna wanawake watu wazima wanaojua kuzihesabu siku za hedhi.

Japo ni wachache kama vidole vyangu.

Eti wamesoma lakini somo hilo liliwapita kama unyunyu wa baharini.

Chaka limekujaa nyetini na mambo ya mimba hujui?

Iweje wajua kula usijue kushiba?

Angalau tafuteni wanaojua kubana siku za kubana.

Achaneni na visichana visivyo na akili.

Jamani wanaume wa leo, shida zenu mwajitakia wenyewe.

mwanamume@yahoo.com

 

 

Wanaume wa leo hawajui kusema la!

Na MWANAMUME KAMILI

Imepakiwa - Tuesday, October 28  2014 at  15:27

Kwa Muhtasari

Mtihani wa mwanamume sio mchezo! Ole wenu nyinyi wanawake wenye kudakia uhusiano kama daladala!

 

MTIHANI wa mwanamume sio mchezo! Ole wenu nyinyi wanawake wenye kudakia uhusiano kama daladala! Shauri zenu wenye pupa wanaokimbilia nyumbani kwa mwanamume kutafuta hifadhi na vichele vya masurufu! Usije juta kugundua umebaki gogo la mzinga na makapa yasio na asali!

Wanaume wa leo hawajui kusema la! Kila kitu wanakitia kinywani japo mara kwa mara hawana haja kula kushiba. Hivyo basi ni wajibu wa mwanamke anayetaka kuolewa na kudumu kwenye ndoa kuwa makini kutambua mitihani atakayokumbana nayo nyumbani kwa mwanamume.

Miaka saba na zaidi kwenye uchumba na mwishowe utapakia nguo na kwenda zako. Hakuna mwanamume kamili atakuoa hujapita mtihani. Hilo sahau kama ulivyosahau nyonyo udogoni. Sisemi kwa kejeli au ufidhuli, lakini ndio ukweli wa mambo. Mwanamke anahitaji maandalizi kabambe asijeachwa kwenye mataa na kilio cha mbwa mdomo juu! Jongea utahiniwe!

 

Rundo la vyombo

Kwanza, mwanamume akikualika nyumbani kwake ukumbane  na rundo la vyombo vilivyojaa mabuu na nguo chafu chini ya kitanda usihadaike kwamba ni mchafu na mvivu. Alijua waja. Angalihofia aibu angalifua na kuosha vyombo!

Pili, unapoingia chumbani ukasikia mwanamume anampigia simu “mama wa usafi” aje kupiga deki na kuosha nyumba kwa malipo, usidhani mwanamume hataki kukuchosha wewe totoshoo!  Anataka wazo kutoka kwako, angalau uonyeshe kuwajibika! Akifika “mama wa usafi” kushika kazi zozote ukiwa nyumbani humo, huna chako. Utaliwa na kutemwa kama pipi iliyokwisha ladha! 

 Tatu, ukikuta nyumba imejaa vyakula aina ainati na apendekeza mwende kula mkahawani, tafadhali nawe usiwe mpumbavu kuanza kumtajia vibanzi na kuku choma! Usirembue macho eti mume anakujali sana. Ni mtihani wa mke kuandaa chakula kitamu kwake!

Nne, siku moja akupe miadi kwenda ziara za porini au kutalii mikoa halafu unapofika kwake unamkuta kajikunyata kama jongoo kitandani. Isitoshe, anakuomba pesa za kumtumia mamake au dadake! Mwanadada, usikunje sura kwa kero wala usianze kuzungusha mboni kama lumbwi! Onyesha unavyomjali na unavyowajali watu wake!  

Tano, unapomtembelea mwanamume ukakuta anapika au anafanya usafi nyumbani, usiketi na kubonyeza kiungambali. Eti wewe na runinga ilhali mwenzako yuko jikoni analizwa na vitunguu! Ukiomba kumsaidia anakujibu,”endelea kutazama runinga, namaliza kazi!” Halafu makalio unayajaza kwenye kochi! Kweli siku zako zinahesabika! Mweleze jikoni ni kwa mke! Mwondoe hapo haraka. Posa utalipiwa mara mbili!

Sita, tuliza kichaa na wazimu wa ujana! Dhihirisha ukomavu na stahamala – vigezo vya mke mwema!

Akizungumza, tulia! Akitoa jicho, nywea! Domodomo eti humezi mate? Mbishani, wewe husikii na hushauriki? Simu, huachi kupiga na maswali ya kitoto? Vituko hivi havikupi mwanamume kamili! Na ukimpata haishi nawe!

Ama wewe ni wa kuteta tu maana hujapigiwa simu au hujaandikiwa arafa hata moja siku nzima! Acha kujipenda! Utaishia kulia chozi kwa wivu wa kitoto bure bilashi! Mke mwema hafichiki!  

Saba, mwanamume akikuvua nguo za juu tafadhali jifunze kumsisitizia kwamba wajitunza na hutaki masihara kabla ya ndoa. Wengi wenu ndio kwanza mtaacha nguo zote sebuleni mkatembea nyumba nzima uchi kama kumbikumbi! Adabu hiyo ni ngao, hadhi na hesima kwa mawanamke. Siku zote tunashinda na vicheche nje, hata nyumbani? Mke mwema lazima ajue vya kubana! Na ajue wapi pa kubanua!

Nane, makinika unapokwenda kwake angalau ubebe vitu vidogo kama nyanya na vitunguu. Usiwe mwanamke wa kujaza tu chupi na vipodozi kwenye mkoba! Hizo ndizo akili wanazochukia wanaume.

Tisa, wakati mwingine nenda kwake na kaseti zenye nyimbo za injili angalau ukipika uwafukuze mashetani kwa nyimbo za kutuka Rabuka. Ukifanya hivyo mwanamume ataona tofauti kati yako na wale mashangingi wanaoimba kinyaa na utashi kwenye vilabu vya walevi.

Kumi, tuliza kichaa na wazimu wa ujana! Dhihirisha ukomavu na stahamala – vigezo vya mke mwema! Akizungumza, tulia! Akitoa jicho, nywea! Domodomo eti humezi mate? Mbishani, wewe husikii na hushauriki? Simu, huachi kupiga na maswali ya kitoto? Vituko hivi havikupi mwanamume kamili! Na ukimpata haishi nawe!  

 

 

Mume kamili ni dafina ya hekima na ustaarabu

Na CHARLES OBENE

Imepakiwa - Wednesday, August 20  2014 at  11:40

Kwa Muhtasari

Mwenzio atakuvumilia hadi lini ilhali wamchanja kwa maneno na mabezo kama ukuni?  Kama ni lazima mume kusema, basi toa mwongozo mara moja na waachie wenye meno kutafuna mabuyu. Kelele kila siku nyumbani kwani wewe chiriku au kasuku?

 

MZAHA mzaha wa mwanaume wa leo hutunga usaha. Jamani sisi watu wazima, mbona kuishi kama vijitoto visivyojua maana ya maisha? Tuzingatie mipaka ya mzaha tusije juta kuachwa tumezubaa kwenye mataa kwa sababu ya ulimbukeni! Kiboko cha adhabu kwa mume kichwa pumba ni kumwacha na kilio cha mbwa mdomo juu!

Nasema hivi kwa kuwa wanaume wa leo wamezidisha mzaha na michezo hadi mambo kuwaharibikia na maisha kukorogeka! Mwanamume umekomaa; mtu mzima mwenye familia lakini ungali katika vikundi vya vijana wanaobaleghe ukishiriki tabia za kudunisha mno.

Hukosi barabarani mkifukuzana na mabanati wa kidato cha pili au kwenye vikundi vya magenge wanaosuta wapita njia! Mume wa mtu, ati! Jamani kuhesabu magari au kukagua waliobeba na waliobebeshwa kamwe haiwezi kumpa mtu riziki au kumwondolea ufukara!

Isitoshe, wewe wa kwanza kusonya na kumfokea mke punde tu unapokosa chakula nyumbani! Mume we! Hutaki kufanya kazi na huna pesa kukidhikia familia, wataka kula vya nani? Familia hula jasho la mume. Hakuna haja kumwachia mke mzigo wa kuwalea watoto na kukulea wewe mtu mzima!

Badala ya kwenda viwandani wanakokwenda wanaume wenye misuli kupanga foleni kwa ajili ya riziki angalau kuvumbua kidogo cha kukidhi mahitaji ya watoto,  mume yuko vijijini akizurura mitaa kama mbwa koko. Mitaani watafuta nini? Wenzako mwakutana wakichuuza njugu na mahamri, wewe huoni haya kubeba na kutembeza mwili bure? Mume mzigo ni dhiki maishani.

Kama lazima kugombana nyumbani, angalau mara moja na sababu iwe ya haja! Lakini mume wa leo ana ulimi mwepesi kama nyaya za gita! Guswa kidogo tu, sauti kama mwehu! Hajui kutulia, kutathmini na kutafakari kwa kina juu ya lolote.  Jambo linalopasa kutatuliwa taratibu kwa mazungumzo mume, atalijengea hoja na nyumbani hakukaliki! Hizo tabia za ujanani sizo za mume kamili.

Mwongozo

 Mwenzio atakuvumilia hadi lini ilhali wamchanja kwa maneno na mabezo kama ukuni?  Kama ni lazima mume kusema, basi toa mwongozo mara moja na waachie wenye meno kutafuna mabuyu. Kelele kila siku nyumbani kwani wewe chiriku au kasuku?

Napenda sana mume msikivu hasa akiwa mbele ya watu. Yaani mwenye kupima uzito wa maneno anayotoa au mwenye kutafakari hatari ya maneno anayotamka. Mwanamume kamili ni dafina ya hekima na ustaarabu! Akizungumza moja tu, hukuacha na la maana! Si kuboboja kama kwamba kapagawa!

Hawa wa leo ni kama samaki; raha yao kudakia kila kitu kinachotupwa kindimbwini.  Mwanamume amesikia jambo lisilomhusu likisemwa lakini atalidakia na kuligeuza lake! Mume mjuvi wa kujifanya kujua kila jambo ni kero. Na huyu akiwa ndani ya nyumba humfanya mke kujichukia! Ya jikoni anayajua yote. Ya hamamuni anayajua juu chini. Ya chumbani, yeyé gwiji! Na sio kujua tu, anataka kukuonyesha anayajua yote! Sasa kazi ya mke ipi?

Heshima ya mume kamili ni kutambua hadhi na kumpa mwenzake nafasi yake ndani ya nyumba. Hizi ndoa za mwajificho tena za matani na mzaha hazifai kitu! Mwenzio kusononeka ni wewe kutaka.

mwanamume@yahoo.com