UTENZI KWA WASIOJIWEZA

Na HAMIS KUNDAI

Imepakiwa - Monday, October 24   2016 at  15:57

Kwa Mukhtasari

Wazee wameridhika

Wazima wavutiya

 

BAADA ya Mapinduzi yalifanyika mambo mengi ya kimaendeleo kama ilivyoelezwa katika beti zilizotangulia.

Hata hivyo kumekuwa na juhudi za kuhudumia watu wenye maisha magumu kama yatima, wazee na walemavu. Endelea kusoma:

  1. Wazee wasojiweza
    Serikali ikawaza
    Bora kuwatengenezea
    Majumba kuwajengeya.

  2. Watoto walo yatima
    Waso baba na mama
    Imetenda jambo jema
    Serikali kuwalea.

  3. Kila aso uwezo
    Hupata kibembelezo
    Kwa fedha zilizo mzo
    Maisha kufurahiya.

  4. Pesa hizo kila mwezi
    Hupewa bila ajizi
    Walipia matumizi
    Kwa wanachohitajiya.

  5. Msaada kila kabila
    Watu hupewa hela
    Hupata bila madhila
    Nao hufurahiya.

  6. Raia wote wa radhi
    Kupata yao faradhi
    Utu wao una hadhi
    Heshima imerejea.

  7. Mwiko tena hawaombi
    Majiani hawatambi
    Jambo hilo kwao dhambi
    Na sasa wametuliya.

  8. Si usiku si mchana
    Naapa hutawaona
    Kwani wao waungwana
    Neema imewangiya.

  9. Wazee wameridhika
    Kwa kupata yao faka
    Miili imekarambuka
    Wazima wanavutiya.

  10. Mtambo wa televisheni
    Umejengwa visiwani
    Seti zimo majumbani
    Watu wanajionea.

  11. Umejengwa kwa gharama
    Kutumia kwa kusoma
    Masomo yenye neema
    Tija yatatuleteya.

  12. Taaluma ya siasa
    Tutachambua kurasa
    Ili tuwe na hamasa
    Ya nchi kujijengeya.

  13. Itasomesha sayansi
    Wana wapate kupasi
    Tena upesi upesi
    Ajizi kuwondokeya.

  14. Tahifadhi mila yetu
    Silika za babu zetu
    Tudhibiti utu wetu
    Na mema kujifanyiya.

  15. Pia itafurahisha
    Vipindi vya kuchekesha
    Watu kuwaburudisha
    Roho zipate tuliya.

  16. Kiwanda cha kuhifadhiya
    Matunda yetu baadhi
    Kitajengwa kutukidhi
    Mali yetu kuwekeya.

  17. Zitahifadhiwa embe
    Kwenye mikebe zirembwe
    Tuzitowelee sembe
    Kwa ladha inovutiya.

  18. Machungwa na mananasi
    Hata piya mafenesi
    Yatawekwa kwa nafasi
    Makoponi kuingiya.

  19. Samaki watovuliwa
    Tutawafanyia dawa
    Na vibatini kutiwa
    Waache kutuozeya.

  20. Samaki tasafirisha
    Baada ya kukaushwa
    Watu watatamanishwa
    Nje kujinunuliya.

  21. Na vijiwanda vidogo
    Navyo vitatupa nogo
    Biskuti za mihigo
    Vitatutengenezeya.

  22. Tutatengeneza mafuta
    Siyo ya kukukereta
    Uhondo tutaupata
    Kwa vyakula kupikiya.

  23. Piya mafuta ya nywele
    Siyo yale ya uwele
    Hutoa hata upele
    Kichwani yakiingia.

  24. Sabuni za kuogeya
    Na piya za kufuliya
    Na hata za kuosheya
    Zote tutajipatiya.

  25. Viwanda hivyo vidogo
    Mambo yake si madogo
    Ni viwanda vya mikogo
    Faida kutuleteya.

  26. Meli kutoka Japani
    Na sasa kiwandani
    Yamalizwa usukani
    Karibu tatufikiya.

  27. Meli tuloinunuwa
    Makusudio ni kuwa
    Watu itawachukuwa
    Wao na mizigo piya.

  28. Meli hiyo kubwa sana
    Kwa urefu na upana
    Watu hawatobanana
    Kwa nafasi taingiya.

  29. Haitakuwa na zogo
    Kwa nafasi ya mizigo
    Hata yakiwa magogo
    Melini yataingiya.

  30. Nafasi ya kulaliya
    Ipo bila ya udhiya
    Vitanda vimeeneya
    Vururu wajipatiya.

  31. Mizigo takaa mbali
    Haichanganywi asili
    Itatengwa kweli kweli
    Mbali na abiriya.

  32. Safari ilo ya raha
    Iliyojaa buraha
    Safi isiyo karaha
    Huku meli yaeleya.

  33. Na televisheni ndani
    Kama mmo majumbani
    Lipi la kukughasini
    Kwa raha mwajioneya.

  34. Uovu kila namna
    Nchini haupo tena
    Watu wote wapendana
    Imani imeeneya.

  35. Zimeondoka fitina
    Za watu kuchukiana
    Na wengine kusutana
    Yote yameshapoteya.

  36. Zimeondoka hasama
    Na hata pia lawama
    Imerejea heshima
    Nyoyo zote metuliya.

  37. Uchafu umeondoka
    Kulewa na kutapika
    Wapi! Umemalizika
    Ibada metanguliya.

  38. Ulevi hautakiwi
    Tende katu huuziwi
    Hata dawa hupewi
    Watu wameikimbiya.

  39. Na bangi yenye madhara
    Ati huitwa sigara
    Imepigwa kipapara
    Haipo imepoteya.

  40. Bangi watu hawavuti
    Majiani na buyuti
    Kwani ina tasiliti
    Mtu wazimu hungiya.

  41. Wameona maradhiye
    Hasa hasa hatimaye
    Huyaponza maishaye
    Mtu hata hujifiya.

  42. Bangi hukupa kichaa
    Na mwisho ukapumbaa
    Kwa wazimu kukujaa
    Maishayo kupoteya.

  43. Na hata hiyo kasumba
    Ikivutwa na mitemba
    Sasa imepigwa kamba
    Visiwani mepoteya.


    Na Hamis Kundai

    Tanzania, Afrika Mashariki

    Imepitiwa na kuidhinishwa na Stephen Maina